DURRES - Një  53 vjeçar është arrestuar në portin e Durrësit pasi tentoi të fuste në Shqipëri në mënyrë të fshehur 44 000 euro.

Me qëllim shmangien e deklarimit në doganë, paratë i kishte fshehur në pjesën e tapicerisë së furgonit, ku dhe policia kufitare i zbuloi pas një kontrolli në vijën e dytë.

Në përfundim të veprimeve procedurale, u arrestua në flagrancë shtetasi Nuri Alushi, 53 vjeç, banues në Vlorë, për veprat penale “Mosdeklarimi në kufi i të hollave dhe i sendeve me vlerë”, "Kontrabanda me mallra që paguhet akcizë" dhe "Kontrabanda me mallra të licencuar". 

Policia gjithashtu sekuestroi dhe një sasi të konsiderueshme pesticidesh, medikamente mjekësore dhe pije.

Operacioni policor u kodua “Destinacioni”.