E trafikonin duke e fshehur brenda djathit 'Parmigiano', sekuestrohet 100 kg kokainë në Itali! Kreu i grupit kriminal, një 37-vjeçar shqiptar

ITALI- Një operacion i gjerë i Guardia di Finanza në Torino, i zhvilluar në qytetin e Astit ka shkatërruar një grup kriminal, i cili merrej me trafikimin dhe shitjen e lëndëve narkotike. Në kuadër të operacionit deri tani janë sekuestruar mbi 100 kilogramë kokainë e cila trafikohej e fshehur brenda djathit parminxhano. Deri tani policia ka arrestuar 10 persona, 7 italianë dhe 3 shqiptarë. Sipas aktakuzës, kreu i organizatës është një 37-vjeçar me kombësi shqiptare. Operacioni për shkatërrimin e bandës nisi në fillim të vitit të kaluar.

Si vepronte grupi kriminal
Ai dhe bashkëpunëtorët e tij kishin krijuar një sistem komunikimi për të bërë komunikime në mënyrë konfidenciale dhe po ashtu kishin gjetur disa vende që i përdornin si depo për magazinimin e drogës.

Ky është mekanizmi me të cilin ka funksionuar grupi kriminal. Ata blinin sasi të mëdha kokaine nga jashtë, veçanërisht nga Holanda dhe e transportonin në Itali. Droga ruhej në magazina në Piemonte, por edhe në zona të tjera të Italisë veriore. Më pas shpërndarja bëhej në rajone të ndryshme (Piemonte, Lombardia, Veneto, Toskana, Siçilia dhe Sardenja), nga trafikantët, të cilët përdornin makina që i kishin në pronësi dhe i merrnin me qira.

Gjatë hetimeve, policia vuri në përgjim trafikantët dhe sekuestroi disa ngarkesa me drogë. 100 kg kokainë e pastër u sekuestruar në prill të 2022, brenda një kampi e cila u zbulua nga nuhatja e qenëve të drogës.

25 kilogramë të tjera kokainë të pastër u gjetën në qershor të vitit 2022 në provincën e Asti-t në një furgon të drejtuar për në Sardenjë dhe te fshehur brenda djathit të tipit Grana Padano-Parmigiano, i përgatitur posaçërisht si ngarkesë mbuluese. Nëse do të shihej “me pakicë”, kokaina do të kapte vlerën e 20 milionë euro.

M.Q./Shqiptarja.com

TAG:
• itali
• kokaine
• guardia di finanza