E pazakontë në Fier/ Babai tenton t'i fusë kokainë të birit në burg...vendi i çuditshëm që e kishte fshehur

FIER- Një situatë aspak e zakontë është regjistruar në Burgun e Fierit! Një baba ka tentuar që t'i fusë kokainë të birit në burg, i cili ishte i dënuar.

Nga sa Report Tv mëson nga burime zyrtare, babai i kishte futur dozat e kokainës në 2 gota plastike, të mirëfshehura.

Për pasojë, babai me inicialet L.Z., është arrestuar dhe ndaj tij rëndon akuza për kryerjen e veprës penale të “Futja ose mbajtja e sendeve të ndaluara në I.E.V.P me Burgim”, “Prodhimi dhe shitja e narkotikëve".

"Në datë 18 janar 2022, rreth orës 15.00, SHKBB u njoftua nga Salla Informacionit IEVP Fier se gjatë kontrollit të ushtruar nga punonjësit e policisë në pakon postare të dërguar nga shtetasi “L.Z.” për të dënuarin “G.Z.” (babë e bir), janë konstatuar të kamufluara dhe të mirëfshehura 2 gota plastike, ku në brendësi të tyre u gjendën kokrra të dyshuara të ngjashme me të lëndës narkotike.

Menjëherë OPGj i SHKBB-së nën drejtimin e Prokurorisë Fier, në bashkëpunim me Drejtorinë e Policisë Fier dhe me Komisariatin e Policisë Lushnje, u koordinua për kryerjen e veprimeve të para hetimore për dokumentimin ligjor dhe zbardhjen e menjëhershme të ngjarjes.

Në bazë të provave dhe fakteve u krye arrestimi në kushtet e flagrancës ndaj shtetasit:

“L.Z.”, i dyshuar për kryerjen e veprës penale të “Futja ose mbajtja e sendeve të ndaluara në I.E.V.P me Burgim”, “Prodhimi dhe shitja e narkotikëve”, të parashikuar nga nenet respektive të 283, 324/a të Kodit Penal", njofton policia.

B.K./Shqiptarja.com

TAG:
• kokaine
• Fier
• burgu i fierit
• i burgosur