E përditshmja franceze 'Grazia' artikull për Gjirokastrën: Nëso doni një mjedis mitik, një arratisje këtu do ishte ideale

Shqipëria është një destinacion ëndrrash ku mund të shijoni bukuritë e një fshati të vendosur në mal! Për më tepër, çmimet sfidojnë të gjithë konkurrencën, shkruan Dallo Dramé në një artikull të botuar në të përditshmen franceze “Grazia”.

Shumë gurë të çmuar janë fshehur në kontinentin e vjetër! Mes fshatrave të saj me bukuri që nuk gjenden askund, plazheve mahnitëse dhe qyteteve të saj të lashta, Evropa nuk ka asgjë për t’u pasur zili në botë.

Shqipëria ofron eksperienca të papërshkrueshme dhe përveç bukurisë së natyrës, çmimet në disa pika turistike janë të përballueshme.

Vizitoni vendin e ri ekzotik dhe përjetoni një eksperiencë unike pa qenë e nevojshme të shpenzoni shumë!

Gjirokastra, një qytet plot hijeshi që nuk e sheh çdo ditë

Nëse dëshironi të vizitoni një mjedis mitik, një arratisje në qytetin e Gjirokastrës do të ishte ideale.

Ky qytet shtrihet në majat e Malit të Gjerë, në jug të Shqipërisë.

Qyteti karakterizohet nga shtëpitë tipike ballkanike dhe për këtë arsye është përfshirë në listën e trashëgimisë botërore të UNESCO-s në vitin 2005.

Sipas përshkrimit të bërë nga UNESCO, qyteti historik i Gjirokastrës është një shembull i rrallë i një qyteti te stilit osman të ruajtur mirë, i ndërtuar nga fermerë që zotëronin prona të mëdha, rreth kështjellës së shekullit të XIII.

Shtëpitë e qytetit të kujtojnë fortesa të vogla të grupuara. Përveç bukurisë së saj, Gjirokasta konsiderohet si një nga qytetet e vetme në botë, e vendosur në shpatet e pjerrëta të një mali, kështu që shëtitjet janë shumë të këndshme, por kërkojnë edhe pak mundim.

Përveç kësaj, ajo ka shumë ndërtesa kulturore dhe historike.

Vendet e paharrueshme në Gjirokastër

Gjirokastra ofron shumë vende për të zbuluar, si Shtëpia e Zekatëve dhe disa muze që tregojnë historinë e së kaluarës së lavdishme të qytetit.

Mos humbisni kalanë e shekullit të XIII, e cila u shndërrua në një burg gjatë periudhës komuniste në vend.

Gjithashtu, vizitoni Pazarin e Gjirokastrës që daton në shekullin e XVII.

Ky qytet historik, gjithashtu ofron shumë ndërtesa të vjetra fetare, si një xhami e vjetër që daton nga koha e Perandorisë Osmane, disa kisha të vjetra si dhe një Bazilikë të madhe që ndodhet jo shumë larg qytetit.

Pse është i favorshëm qëndrimi në këtë qytet?

Përveç ekskursioneve historike dhe pamjeve që të lënë pa frymë, jetesa në këtë zonë të Ballkanit është shumë e lirë.

Hotelet që ofrojnë pamje të perëndimit të diellit nga mali, kushtojnë mesatarisht 40 deri në 75 euro për person për 5 netë.

Këto çmime, më shumë se të favorshme, përfshijnë gjithashtu mëngjesin.

Nga bregu i Sarandës mund të shijoni bukuritë e ishullit të Korfuzit. Në të vërtetë, ky ishull ndodhet jo shumë larg Gjirokastrës.

Për shkak të vendndodhjes së tij, ky qytet ofron pamjet më befasuese në Evropë.

Një gastronomi që e shijojmë rrallë

Ushqimi është veçanërisht i bollshëm. Gjirokastra ndodhet në udhëkryq të kulturave të ndryshme të kuzhinës, prandaj gastronomia e saj është e pasur dhe unike.

Ajo është e ndikuar nga trashëgimia e saj osmane me ndikimet mesdhetare, por edhe nga kuzhina dominuese ballkanike.

Por, Gjirokastra ofron edhe specialitetet e veta që nuk mund të shijohen askund tjetër.

Gjirokastra është një destinacion që ia vlen të vizitohet për çmimet e pakrahasueshme, pikat turistike unike dhe gastronominë mahnitëse./ atsh

G.K/Shqiptarja.com

TAG:
• Gjirokaster
• turizem
• fermer