E shtunë aksidentesh në Fier, 6 të plagosur, mes tyre 2 gra! Makinat 'fluturojnë' në kanal e mbi trotuare

Fier - E shtuna e aksidenteve në Fier, ka shënuar një tjetër dalje nga rruga të një automjeti i cili ka përfunduar në kanalin anësor të rrugës në vendin e quajtur “ Ura e Bacinozit” në aksin Fier- Seman.

Në vendngjarje ka mbërritur menjëherë ambulanca dhe policia, ndërsa informacionet paraprake bëjnë me dije se drejtuesi i automjetit i identifikuar si Ervis Ramaj, 36 vjeç, është plagosur dhe është dërguar urgjentisht drejt Spitalit Rajonal të Fierit.

'Rreth orës 21:30, në aksin rrugor "Fier-Seman", shtetasi E. R., 36 vjeç, duke drejtuar automjetin tip "Benz", ka humbur kontrollin mbi drejtimin e automjetit dhe për pasojë automjeti ka dalë nga rruga",- njofton policia.

Grupi hetimor po punon për zbardhjen e dinamikës së këtij aksidenti të rëndë.

Fier - Një aksident ka ndodhur rreth orës 19:00, në aksin rrugor Fier- Patos, në fshatin Portëz, ku një automjeti tip “Audi” është përplasur me një automjet tip "Opel".

Si pasojë e përplasjes së fortë dy automjetet me drejtues të identifikuar si Xh.G. dhe H.Rr., kanë përfunduar në kanalin anësor të rrugës.

Raportohet se shoferi H.Rr., i cili ishte drejtues i “Opelit”, ndodhet në spital në kujdesin e mjekëve.

“Rreth orës 19:00, në aksin rrugor "Patos-Fier", në fshatin Portëz,  automjeti tip "Audi", me drejtues shtetasi Xh. G., është përplasur me mjetin tip "Opel", me drejtues shtetasi H. Rr., i cili ndodhet në spital, në kujdesin e mjekëve”,-njofton policia.

Grupi hetimor vazhdon veprimet në vendngjarje për zbardhjen e plotë të rrethanave të aksidentit.

Një aksident i rëndë automobilistik ka ndodhur në Fier ku janë përplasur tre mjete. Rreth orës 17:00, në aksin rrugor "Fier-Seman", në fshatin Ferm Çlirim, automjeti tip "Benz" është përplasur me automjetin tip "Toyota".

Kanë mbetur katër persona të plagosur nga ky aksident që më pas janë strasportuar në spital. DKonkretisht të lënduar janë drejtuesit e automjeteve, si dhe dy pasagjeret e automjetit tip "Toyota" të cilat ndodhen në spital, në kujdesin e mjekëve.

Report tv sjell pamje të rënda ku duken makinat të shkatërruara e madje njëra prej tyre ka fluturuar në trotuar.

Disa minuta më vonë një tjëtër aksident automobilistik është shënuar në aksin rrugor Fier- Patos, në vendin e quajtur “ Kthesa e Portezës” ku dy automjete janë përplasur me njëra-tjetrën, duke përfunduar më pas në kanalin anës rrugës.

Ndërkohë grupet hetimore vazhdojnë veprimet në vendngjarje për zbardhjen e plotë të rrethanave të aksidenteve.