Elbasan- Një aksident është regjistruar në aksin rrugor “Mollas-Gostimë” në Elbasan. Policia bën me dije se një makinë ka dalë nga rruga dhe si pasojë ka përfunduar brenda një lokali.

Si pasojë e aksidentit të lënduar kanë mbetur katër persona të cilët ndodhen jashtë rrezikut për jetën.

Ndërkohë policia ka nisur hetimet  për shoferin 30-vjeçar. 

“Specialistët e Qarkullimit Rrugor referuan materialet në Prokurori ku nisi procedimi penal për shtetasin Q. D., 30 vjeç, pasi në aksin rrugor "Mollas-Gostimë", automjeti që ai drejtonte ka dalë nga rruga dhe është përplasur me pjesën e jashtme të lokalit të shtetasit R. Ç.. Si pasojë janë shkaktuar dëme materiale në lokal, si dhe janë dëmtuar lehtë 2 shtetase që ndodheshin në këto ambiente. Gjithashtu, janë dëmtuar drejtuesi i automjetit shtetasi Q. D., dhe pasagjeri në automjetin e tij shtetasi G. Z., 21 vjeç, të cilët janë në kujdesin e mjekëve, jashtë rrezikut për jetën”, informoi sot policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.