ELBASAN- 15 arka me municion luftarak, fishekë pistolete dhe automatiku si dhe 12 granata dore janë sekuestruar gjatë një aksioni të Policisë së Elbasanit. Report Tv mëson se armët janë gjetur të braktisura në një pyll.

Aksioni i bluve të Elbasanit është ndërmarrë si rezultat i bashkëpunimit me qytetarët të cilët kanë njoftuar se në thellësi të fshatit Godolesh ndodhej një arsenal luftarak.

Njoftimi i policisë

Sekuestrohet një arsenal me fishekë luftarakë e granata

Falë bashkëpunimit me qytetarët,  zbulohet dhe sekuestrohet një arsenal municionesh luftarake.

Policia e Elbasanit , si rezultat i bashkëpunimit me qytetarët ka marrë informacion se  në një zonë të thellë në afërsi të fshatit Godolesh, Elbasan,  ndodhej një arsenal me municione luftarake.

Me  marrjen e informacionit  menjëherë është organizuar puna për krehjen e zonës. 

Si rezultat i kontrollit të ushtruar u gjetën  dhe u  sekuestrua në cilësinë e provës materiale,  15 arka me municion luftarak, fishekë pistolete dhe automatiku si dhe 12 granata dore.

Nga veprimet e para dyshohet se si rezultat i kontrolleve të shtuara ditët e fundit  nga Policia e Elbasanit në banesa, objekte të  braktisura , magazina  apo tunele, personat që mund ti kenë pasur këto municione i kanë fshehur  në këtë zonë me qëllim shmangien e kontrollit të Policisë  

Policia vijon hetimin për identifikimin dhe dokumentimin e plotë të ngjarjes.