EMRI/ Ndezi zjarr për të djegur barishte në tokën e tij, flakët u përhapën dhe dogjën dhjetëra hektarë në Levan! Arrestohet 42-vjeçari

Fabio Rrapaj është vënë në pranga si përgjegjës për zjarrin në fshatin Levan të Fierit, ku flakët u përhapën në zonë, pasi ai tentoi të digjte disa barishte në tokën e tij.

Shërbimet e Policisë kanë bërë të mundur identifikimin dhe arrestimin e autorit të dyshuar të zjarrvënies, Fabio Rrapaj 42 vjeç, banues në fshatin Jarua, Fier.

42-vjeçari, me qëllim djegien e barishteve në tokën e tij, ka ndezur zjarr dhe për shkak të erës, zjarri ka marrë përmasa të mëdha duke djegur 20 hektarë me bimësi, 2 hektarë vreshta dhe 400 rrënjë ullinj.

Autorët e veprimtarive kriminale të zjarrvënies së qëllimshme apo nga pakujdesia, gjatë këtij sezoni, janë vënë në pranga 4 shtetas, janë proceduar në gjendje të lirë 9 shtetas dhe 1 është shpallur në kërkim.

Drejtoria Vendore e Policisë Fier apelon për qytetarët, që në asnjë rast të mos ndezin zjarre, pasi ky veprim përbën krim dhe ndëshkohet penalisht, si dhe i fton ata që të denoncojnë në numrin 112, çdo rast të tillë, me qëllim ndërhyrjen e menjëhershme për shuarjen e flakëve dhe për procedimin penal të shtetasve përgjegjës.

M.T/KT/Shqiptarja.com

TAG:
• zjarrvenie
• zjarr
• levan
• Fier