Engel dhe Sell: Paralelizmi mes 
Krimesë dhe Kosovës, i gabua

SHBA- Anëtari i Dhomës së Përfaqësuesve të Kongresit amerikan,  Eliot Engel dhe ish-ambasadori amerikan, Lois Sell janë shprehur se rasti i Krimes nuk ka asnjë të ngjashme me Kosovën. Ata shprehen si paralelizmat janë të sajuara dhe aspak të bazuara në fakte.
 
Në një intervistë për “Zërin e Amerikës” Engel tha se do të ishte e gabuar të bëheshin paralelizma mes rastit të Krimesë dhe atij të Kosovës, sepse secili nga këto raste është i veçantë pasi në Kosovë bëhej fjalë për një popullsi që duhet shpëtuar ndërsa në Krime Presidenti Vladimir Putin po tregohet agresiv dhe po përpiqet të aneksojë një pjesë të një vendi tjetër, nën pretekstin se shumica e popullsisë në Krime, që është rusishtfolëse, ka nevojë të jetë e lirë, apo se asaj po i shkelen të drejtat në një farë mënyre. “Kjo është e gënjeshtërt” - nënvizon Engel.

Ai e krahasoi gjendjen e dikurshme të Kosovës me atë që ndodh sot në Siri.
 
"Unë do ta krahasoja Kosovën me Sirinë. Atje kemi një popullatë civile të rrezikuar dhe është e tmerrshme që komuniteti ndërkombëtar në një farë mënyre po i kthen shpinën Sirisë."

 Ndërsa ish-diplomati amerikan Lois Sell në një intervistë për “Radio Europa e Lirë “ thotë se krahasimi është i sajuar dhe ai nuk qëndron aspak.
 
“Mendoj se është tërësisht i shtrembëruar e madje edhe i sajuar. Sinqerisht, analogjia me Kosovën thjesht nuk pi ujë, as në kuptimin ligjor, e as në atë faktik”, ka thënë duke argumentuar përgjigjen me fakte historike të dy vendeve.
 
“Gjëja më e rëndësishme që duhet përmendur këtu është shkalla e persekutimit të popujve në këto dy vende respekitve. Ndërhyrja ndërkombëtare në Kosovë erdhi në vitin 1999, shumë vonë sipas mendimit tim, por vetëm pasi që Kosova iu nënshtrua një dhunë 10 vjeçare nga Milosheviçi, i cili atëbotë rrënoi autonominë e Kosovës në mënyrë të paligjshme dhe të dhunshme në vitin 1989. Në Krime, popullata ka jetuar në një atmosferë pak a shumë harmonie. Nuk ka pasur shtypje të përmasave të mëdha, dhe as të përmasave të vogla. Ka pasur disa periudha kur grupe të ndryshme janë trazuar për shkak të marrëdhënieve të caktuara me Ukrainën apo me Rusinë dhe ato shqetësime janë zgjidhur me marrëveshje pikërisht në mes të Ukrainës dhe Rusisë.  Popullata ruse në Krime nuk ka qenë në asnjë mënyrë e kërcënuar nga ngjarjet në Krime. Çdo pretendim se diçka e këtillë ka ndodhur janë është i rremë”, është shprehur ai.
 
 Në intervista të ndryshme, midis të tjerësh, edhe Vladimir Putin është shprehur Krimea është një rast i ngjashëm me Kosovën.

Redaksia online
(esh/shqiptarja.com)