Moti i keq/ Reshje të dëndura dëbore në Korçë e Kukës, dhjetëra familje pa energji elektrike në disa bashki! Në Lezhë, era rrëzon pemën dhe dekoret festive

Moti i keq në vend me reshje dëbore e shiu dhe erë të fortë ka shkaktuar probleme në disa prej qarqeve. 

Në Korçë, ka pasur reshje të dendura, duke bërë që trashësia e dërborës në Dardhë që njihet si zonë turistike të arrijë deri në 40 cm, ndërsa në Mashkullore arrin deri në 1 metër. Si pasojë, rreth 466 familje në bashkitë, Ersekë, Devoll dhe Maliq kanë mbetur pa energji elektrike për disa orë derisa u rikthye në orët e mbrëmjes.

4 borëpastruese kanë punuar në Qafën e Qarrit, 3 në Dardhë dhe 2 në Voskopojë. Në të gjitha akset dhe segmentet rekomandohen goma dimërorë dhe në disa pjesë të këtyre segmenteve këshillohen drejtuesit e mjeteve të kenë me vete dhe zinxhirët.

Edhe në Kukës, dhjetëra fshatra të disa njësive administrative, si dhe të bashkisë së Hasit e Tropojës, kanë mbetur pa energji elektrike. Në disa prej fshatrave energjia është rithkyer gjatë orëve të pasdites. Sipas informacioneve, për shkak të dëborës, është bllokuar rruga Qafë Borje-Doganë. 

Në Lezhë, era e fortë që ka përfshirë rajonin që prej mesditës të së premtes, ka krijuar probleme edhe gjatë ditës së sotme (16 dhjetor). Si pasojë e erës së fortë, është rrëzuar pema e Krishtlindjeve dhe vitit të ri, e vendosur në sheshin “Gjergj Kastrioti” si dhe ka pësuar dëmtime edhe dekori festiv.

Gjithashtu janë dëmtuar edhe linjat elektrike në disa zona por falë ndërhyrjes së OSHEE, u bë i mundur rikuperimi i shpejtë i dëmeve brenda një kohe të shkurtë me qëllim që mos të ketë ndërprerje të gjatë të energjisë elektrike. Probleme me qarkullimin e mjeteve janë regjistruar në shumë fshatra që janë prekur nga moti i keq. 

Rendit zhvillimet sipas orarit:

Të Fundit Të Parat

B.V/B.K/Shqiptarja.com

TAG:
• moti i keq
• Lezhe
• moti
• gramsh
• Elbasan