Ervin Salianji “merr” Krujën,
ngushtohet diferenca me Këlliçin

Zgjedhjet për kryetarin e ri të Forumit Rinor të Partisë Demokratike u zhvillon sot në Krujë, ku fitues u shpall Ervin Salianji me 182 vota, i ndjekur nga Oriela Nebijaj me 89 vota dhe Belind Këlliçi me 76 vota. Në rang kombëtar vazhdon të kryesojë Këlliçi me 253 vota më shumë se Salianji, kur kanë mbetur edhe 11 Konventa për t’u zhvilluar deri në përfundim të garës për kryetarin e FRPD.
 
Fillimisht, tre kandidatët në garë Ervin Salianji, Belind Këlliçi dhe Orjela Nebijaj kanë debatuar mbi mundësitë dhe punën që duhet të bëjë Forumi Rinor i Partisë Demokratike për të qenë më aktiv pranë të rinjve, në çdo problematikë apo kauzë të tyre.
 
Të tre kandidatët kanë në platformat e tyre që forumi duhet të jetë gjithmonë pranë kauzave të të rinjve. Ata ndanë ide për mënyrat se si duhet të qasen ndaj shqetësimeve të të rinjve dhe si duhet të mbështeten kauzat e të rinjve kudo ka padrejtësi ndaj tyre.
 
Konventa e Krujës u prit nga qindra të rinj të zonës dhe u përshëndet nga i ngarkuari i kryesisë, Aldo Bumçi. Deputeti Bumçi vlerësoi rolin e të rinjve dhe garën e ideve për drejtimin e këtij forumi ndërsa theksoi frymën e bashkëpunimit mes kandidatëve dhe të rinjve të tjerë në Partinë Demokratike.
 
Nga ana tjetër, Bumçi kërkoi që të rinjtë shqiptarë të angazhohen në politikë për të garantuar ndryshimin në vend duke i ftuar ata në Partinë Demokratike.
 
Nesër konventa e debatit të të rinjve zhvendoset në Korçë ku një tjetër temë debati i pret 3 kandidatët në garë teksa ajo po afron drejt gjysmës së saj.

Redaksia Online
(u.s/shqiptarja.com)