EULEX akuza të reja për Limajn
buxheti u dëmtua me 890 mijë €

PRISHTINE- Ndaj ish-ministrit të Transportit Fatmir Limaj është ngritur edhe një aktakuzë nga Prokuroria Speciale e Kosovës. Një prokuror ndërkombëtar ka ngritur aktakuzë ndaj Limajt dhe katër personave të tjerë të bashkë-akuzuar për vepra të ndryshme penale. Ata akuzohet për krim të organizuar, përvetësim, lidhje të kontratave të dëmshme, keqpërdorim të detyrës zyrtare ose të autoritetit, mitmarrje dhe vepra të tjera të lidhura me korrupsionin.
 
Prokurori pretendon se buxheti i Ministrisë është dëmtuar për së paku 890 mijë euro.
 
Sipas prokurorit ndërkombëtar nga Prokuroria Speciale e Kosovës (PSRK) tre të pandehur kanë manipuluar me procedurat e tenderit, janë marrë me dhënie dhe marrje të mitës dhe me pengim të provuarit në lidhje me administrimin e dy tenderëve në kompetencë të Ministrisë së Transportit. Këta të pandehur pretendohet se i kanë kryer këto vepra për përfitim material personal. Dy të pandehur pretendohet se janë angazhuar në keqpërdorimin e autorizimeve ekonomike, si edhe në veprën penale të dhënies së mitës.
 
Sipas prokurorit, këto vepra ndodhën më 2008 kur njëri prej të pandehurve punonte si Ministër i Transportit.
 
Ky hetim i përbashkët është kryer nga Departamenti Kundër Korrupsionit i Policisë së Kosovës dhe nga Njësia e EULEX-it për Hetimin e Krimit të Organizuar (NJHKO) dhe është udhëhequr nga një prokuror ndërkombëtar nga PSRK.

Redaksia Online
(e.s/shqiptarja.com)