Europa thirrje Trump:Respekto
marrëveshjen bërthamore të Iranit

Diplomatët e vendeve Europiane i kanë bërë thirrje presidentit Trump që të mos “vrasi” marrëveshjen nukleare të arritur me Iranin, ndërkohë që Trump është duke marrë në konsideratë vendosjen e sanksioneve të tjera mbi Iranin përpara përfundimit të afatit i cili përfundon ditën e nesërme.

Trump ishte zotuar se do të prishte marrëveshjen gjatë fushatës së tij elektorale, duke ju referuar asaj si “Marrëveshja më e keqe ndonjëherë” dhe duke akuzuar Iranin për dhunim të shpirtit të paktit.

Vendet Europiane të cilat kanë qenë ndërmjetësuesit e marrëveshjes me administratën e ish- presidentit Obama, i kanë këruar Trump të heqi sanksionet e fundit ndaj Iranit, për të mbajtur gjallë marrëveshjen.

Duke folur në Bruksel pas një takimi me ministrat e jashtëm të Iranit, Mbretërisë së Bashkuar, Francës dhe Gjermanisë, përfaqësuesja e lartë e politikës së jashtme, Federica Mogherini, tha se të gjithë ministrat kanë rënë dakord për implementim të plotë të marrëveshjes së arritur, për të qenë të sigurt se heqja e sanksioneve do të ketë një impak pozitiv duke sjellë përfitime edhe për popullin Iranian.

Ministri i Jashtëm Francez, Jean Yves Le Dran, i ka drejtuar një apel të drejtpërdrejtë SHBA-së për të nënshkruar heqjen e sanksioneve, gjë e cila duhet bërë deri të premte, duke thënë se “Franca qëndron vigjilente ndaj implementimit të marrëveshjes, të gjitha palët duhet t’i qëndrojnë marrëveshjes”.

Marrëveshja mes Iranit dhe administratës së Obamës u arrit në vitin 2015 me ndërmjetësimin e Anglisë, Rusisë, Francës, Gjermanisë dhe Kinës. Sipas marrëveshjes së nënshkruar Irani do të limitonte programin e tij nuklear në këmbim të heqjes së sanksioneve të cilat tkurrën ekonominë e vendit.

Nga ana tjetër, burime të cituara në mediat amerikane, bëjnë të ditur se Trump është takuar më herët gjatë kësaj jave më këshilltarët e tij për këtë çështje, të cilët e kanë këshilluar të rishikojë sanksionet e vendosura në marrëveshje.

Redaksia Online
D.T/Shqiptarja.com