Faksimile e listës së kandidatëve/ Ja
si u tall Basha me qytetarët e Vlorës

Tallje dhe fyerje për qytetarët e Qarkut të Vlorës. Vetëm kështu mund të cilësohet lista e hartuar nga kryetari i Partisë Demokratike Lulzim Basha të cilës në fakt i mungon që në krye emri i Qarkut. Mjafton të shikoni formularin e depozituar në Komisionin Qendror të Zgjedhjeve dhe të firmosur nga kreu demokrat.

Ndonëse Qarku i Vlorës ka 12 deputetë, demokratët e kanë patur të pamundur që së paku të gjejnë 12 emra. Kanë gjetur me shpejtësi vetëm shtatë të tillë, mes të cilëve futet edhe kreu i Partisë Bashkimi për të Drejtat e Njeriut Vangjel Dule dhe ish-deputeti i PDIU-së Dashamir Tahiri. E mjerueshme edhe pjesëmarrja e femrave në këtë listë duke u mjaftuar vetëm me një të tillë. Ndoshta mund të jetë justifikim i demokratëve vetëm fakti se asnjë prej emrave nuk ka të shënuar as gjininë.

Ndryshe nga sa detyron Komisioni Qendror i Zgjedhjeve në formularin zyrtar, Lulzim Basha e ka patur të pamundur të shënojë të paktën edhe datëlindjen e kandidatëve të cilëve u mungon çuditërisht edhe atësia. Nuk dihen rrethanat në të cilat është hartuar kjo listë por gjasat janë që të jetë bërë me telefon në minutat e fundit të skadimit të afatit zyrtar të Komisionit Qendror të Zgjedhjeve. Lexo.al


dy.b/shqiptarja.com