Kapiteni i Kosovës, Amir Rrahmani, thotë se largohet nga Dardanët, pasi prej dy vitesh është sulmuar nga drejtuesit e federatës. Në mënyrë tepër të befasishme, ai mbyll këtë derë, ndërsa përfaqësuesit ligjorë njoftojnë se do ta ndjekin çështjen në gjyq.

"Faleminderit për gjithçka, Kosovë. Gjithmonë me ty, gjithmonë për ty", shkruan ai krah postimit.

Njoftimi i përfaqësuesve ligjorë të Rrahmanit: 

“Zyra e Avokatëve Hodaj & Partners njofton opinionin publik se ka marrë përsipër përfaqësimin ligjor të kapitenit të Kombëtares së Kosovës, z. Amir Rrahmani, lidhur me çështjet që kanë të bëjnë me sulmet, kërcënimet, fyerjet dhe cenimin e reputacionit të tij nga persona kyq dhe të lidhur brenda Federatës së Futbollit të Kosovës. 

Në kuadër të këtij përfaqësimi, tashmë janë ndërmarrë veprimet e para ligjore dhe janë paraqitur pranë organeve të drejtësisë, të mbështetur në prova dhe fakte, ndaj personave përgjegjës që janë identifikuar dhe priten të identifikohen. 

Për më shumë se dy vite, kapiteni Rrahmani është përballur me kërcënime, sulme dhe presione të vazhdueshme. Përkundër kësaj, ai ka zgjedhur që shqetësimet e tij t'i adresojë brenda dhe të mos i bëjë publike, duke vënë interesin e Kombëtares dhe të Kosovës para interesit të tij personal.

Nga ky moment, çështjet që kërkojnë trajtim juridik do të adresohen përmes rrugëve institucionale dhe mbi bazën e provave.

Besojmë se institucionet e drejtësisë do ta thonë fjalën e tyre dhe, si përfaqësues ligjorë të z. Rrahmani, do të ndërmarrim të gjitha veprimet e nevojshme për mbrojtjen e të drejtave, integritetit dhe reputacionit të tij.

Zyra e Avokatëve Hodaj & Partners 
Përfaqësues të autorizuar të Amir Rrahmanit”