Hoxha takim me ministrin e Jashtëm të Malit të Zi: Riaktivizojmë takimet qeveritare! Ibrahimoviç: Interes për më shumë investime në Shqipëri

Ministri i Jashtëm Ferit Hoxha priti në një vizitë zyrtare homologun e tij të Malit të Zi, Ervin Ibrahimoviç.

Kryediplomatët e dy vendeve pararojë në procesin e integrimit europian u  angazhuan për më shumë bashkëpunim dhe fokus tek projektet e përbashkëta infrastrukturore. Për kryediplomatin Hoxha, me rëndësi është rikthimi i takimeve të përbashkëta qeveritare.

“Të riaktivizojmë një mekanizëm të rëndësishëm që është takimi qeveritar, kur të kemi edhe elementët e nevojshëm për të shkuar më tej. Vëmendja jonë duhet të përqendrohet te projektet ndërkombëtare. Do të angazhohemi për t’i dhënë shtysë projekteve prioritare si hapja e doganës së përbashkët kufitare Zogaj–Skje, avancimi i urës mbi lumin Buna dhe hekurudha Podgoricë–Hani i Hotit. Çdo sukses i malit të zi në rrugën e anëtarësimit në BE, është lajm i mirë për rajonin dhe një kontribut për forcimin e perespektivës evropiane në Ballkanin Perëndimor”, tha Ferit Hoxha.

LEXO EDHE:
Ferit Hoxha në Sofje: Shqipëria e vendosur të çojë përpara reformat, synojmë të bëhemi pjesë e BE-së deri në vitin 2030

“Objektivi ynë është anëtarësimi i Malit të Zi në BE gjatë vitit 2028. Është domethënëse që Mali i Zi dhe Shqipëria janë aktive në negociata dhe dy vendet tona do të vijojnë të tregojnë shembullin e përgjegjshmërisë dhe bashkëpunimit në rajon. Theksuam nevojën për një ndërlidhje më të fortë ekonomike në fushën e infrastrukturës. Kemi interes për të pasur një prani më të lartë të kompanive malazeze në Shqipëri”, tha Ibrahimoviç.

Mali i Zi do të jetë mikpritësi i radhës i Samitit BE-Ballkani Perëndimor që do të mbahet më 5 qershor, Takimi paraardhës u mbajt në Tiranë më 6 dhjetor të 2022-shit, për herë të parë në territorin e një vendi që nuk ishte pjesë e BE-së.

 

K.B/A.M/Shqiptarja.com

TAG:
• integrimi ne be
• mali i zi
• Ervin Ibrahimovic
• Ferit Hoxha