Fier, bashkia: Gjobë bizneseve
që ndotin lumin Gjanica

Lumi Gjanica në Fier ishte kthyer në makth për banorët, pasi shumë herë ka përmbytur shtëpitë e tyre.

Por pas ndërhyrjeve të Bashkisë së Fierit, lumi ishte sistemuar për një kohë të gjatë. Por papërgjegjshmëria e disa bizneseve po i rikthen identitetin lumit të tmerrit. Në shtratin e lumit përsëri kanë rifilluar të hidhen mbetje urbane dhe hidrokarbure  që vinë nga zonat  naftëmbajtëse. Banorët shprehen mjaft të indinjuar me situatën e paraqitur.
 
“Nuk është faji i Bashkisë së Fierit për mbetjet hidrokarbure, këto janë probleme të naftës dhe duhet vetë ndërmarrjet e naftës private ose shtetërore për t’i pastrua këto mbetje, pasi janë në dëm të të gjithë komunitetit”,është shprehur një prej banoreve.

Ndërsa në Bashkinë e Fierit shprehen se do të merren masa duke iu vendosur gjoba të gjitha bizneseve që hedhin mbetje në lumin Gjanica.

Ndërkohë një qytetar tjetër ka vënë në dukje që janë edhe vetë banorët të cilët ndotin lumin, pasi hedhin në të mbeturina të ndryshme.

“Duhet të jemi ne të ndërgjegjshëm në radhë të parë për të mos hedhur mbeturina sepse në vend që t’i hedhin te koshi i hedhin në Gjanicë”, tha një qytetar tjetër.

Përveç problemeve me përmbytjet që u krijohet banorëve të cilët kanë shtëpitë rreth lumit, këto mbetje përfundojnë në det ku rreziku shtohet dyfish pasi derdhja e kimikateve të ndryshme përcillet direkt në shëndetin tonë. 


Redaksia Online
(B.K/Shqiptarja.com)