Fier, tentoi të vrasë me armë një 32-vjeçar, pranga autorit dhe dy bashkëpunëtorëve

Tre persona janë arrestuar nga policia e Fierit, pasi njëri prej tyre tentoi të vrasë me armë zjarri një 32-vjeçar.

Ngjarja ka ndodhur në fshatin Kreshpan, ndërsa në pranga u vunë shtetasit E. M., 35 vjeç, si autor i dyshuar i ngjarjes dhe dy bashkëpunëtorët, M., 69 vjeç dhe Z. M., 47 vjeç, të cilët ndihmuan autorin e dyshuar, duke i fshehur armën.

Në cilësinë e provës materiale u sekuestruan arma e krimit (pistoletë me mulli) dhe 80 fishekë.

Njoftimi i plotë i policisë

Tentoi të vriste me armë zjarri një shtetas, Policia zbardhi ngjarjen në kohë rekord dhe arrestoi në flagrancë autorin dhe 2 shtetas të tjerë.

Në sallën operative të DVP Fier ka ardhur një telefonatë nga shtetasi A. Y., se në fshatin Kreshpan një person kishte tentuar ta vriste. Policia ka vlerësuar menjëherë situatën duke organizuar punën për zbardhjen e ngjarjes, identifikimin dhe arrestimin e autorit.

Falë veprimeve të shpejta operacionale dhe hetimore u bë e mundur zbardhja në kohë rekord e ngjarjes, identifikimi, lokalizmi dhe kapja në flagrancë e autorit, shtetasit E. M., 35 vjeç, banues në Kreshpan, i cili ishte larguar nga vendngjarja.

Në vijim të veprimeve hetimore, Policia ka arrestuar në flagrancë edhe 2 shtetas të tjerë (të afërm të shtetasit E. M.), të cilët e kishin ndihmuar autorin duke i fshehur armën me të cilën ai kishte tentuar të vriste për motive të dobëta shtetasin A. Y., 32 vjeç, banues në Kreshpan.

Specialistët për Hetimin e Krimeve në Komisariatin e Policisë Fier arrestuan në flagrancë, për moskallëzim krimi, shtetasit F. M., 69 vjeç dhe Z. M., 47 vjeç, banues në Kreshpan.

Në cilësinë e provës materiale u sekuestruan arma e krimit (pistoletë me mulli) dhe 80 fishekë.

Materialet i kaluan Prokurorisë pranë Gjykatës së Shkallës së Parë Fier, për veprat penale "Vrasja e mbetur në tentativë", "Mbajtja pa leje e armëve dhe municionit luftarak" dhe "Moskallëzim krimi, i kryer në bashkëpunim".

TAG:
• arrestim
• Fier
• tentative vrasjeje