Fleckenstein: Kuvendi të votojë
të enjten propozimin e Nuland

Eurodeputeti gjerman, njëherazi raporter për Shqipërinë në Parlamentin Europian, Knut Fleckenstein, u shpreh në një konferencë për shtyp, pas takimeve me liderët e politikës shqiptare ku ishte i shoqëruar së bashku me ambasadoren e  BE, Romana Vlahutin, se Kuvendi duhet të votojë të enjten draftin hibrid me propozimet e SHBA dhe BE. 

"Propozimi që kemi në tryezë është i pranueshëm për pjesën më të madhe të Parlamentit. Pranohet edhe nga misioni i BE dhe ambasada e SHBA në Shqipëri. Pranohet nga DASH, nga Brukseli, Komisioni Europian dhe Parlamenti Europian. Draftin e pranon edhe zonja Merkel e krerët e shumë shteteve anëtare të BE", u shpreh Fleckenstein. 

Ai tha se nga takimet nuk ka marrë garanci mbi atë se çfarë do të ndodhë ditën e enjte, por shtoi se shpreson në gjetjen e një kompromisi të minutës së fundit. "Nuk mora asnjë garanci sot. Përshtypja që mu krijua është se ka vullnet të mirë, për të gjetur një kompromis të minutës së fundit për të gjetur zgjidhje për këtë çështje të vogël. Do ta shikojmë ditën e enjte këtë", tha ai.

Nëse reforma dështon ditën e enjte, vijoi Fleckenstein, ajo që mbetet është referendumi popullor. Ai nuk foli për qeveri teknike apo zgjedhje përpara afatit Kushtetues, por theksoi se nëse reforma dështon të enjten, atëherë duhet të pyeten qytetarët shqiptarë.

"Nëse politikanët nuk bien dakord me njëri-tjetrin, duhen pyetur qytetarët. Pash sot disa përfaqësues të shoqërisë civile që qëndronin para Kuvendit, duke i kërkuar deputetëve të Kuvendit që të votojnë pro. Dhe unë kam shumë simpati për këta. Mendoj se do ishte ide e mirë që edhe Këshilli i Integrimit të jepte fjalën e vet para të mblidhet Kuvendi", theksoi eurodeputeti gjerman. 

Fleckenstein shmangu komentet për deklaratën e një dite më parë të kryetarit të Kuvendit, Ilir Meta, se pas votimit të reformës në drejtësi duhet të krijohet qeveri teknike për të drejtuar vendin deri në zgjedhje. 

Konferenca e plotë për mediat e Knut Fleckenstein:
"Tashmë ka mbetur vetëm një çështje e vogël. Kemi theksuar sesa e rëndësishme është pjesëmarrja e Operacionit Ndërkombëtar të Monitorimit në këtë proces. Më lejoni që të bëj edhe një koment personal se pse në Bruksel është rënë dakord me propozimin e PD me mekanizimin 6+6. Dhe ata na thanë që do të jetë për arsye të ndërkombëtarëve që të themi se ata që janë të këqij do të kenë dalë nga sistemi në momentin kur komisioni të ketë marrë vendimet e fundit. Unë sot kam folur me ambasadorët në Shqipëri, Romana Vlahutin, ambasadorin Lu, jam takuar me kryeministrin, kryetarin e kuvendit dhe kryetarin e opozitës. Ne mbështesim plotësisht dhe tërësisht kryetarin e Kuvendit në përpjekjet e tij të fundit për konsensus. PD ka një problem me atë sesi do të jetë i përfshirë në procesin e vettingut ONM. Unë nuk jam jurist. Për ta, pjesëmarrja e ndërkombëtarëve nuk është në pikëpyetje, është çështja sesi. Dhe kjo duhet të jetë në përputhje me Komisionin e Venecias. Propozimi që kemi në tryezë është i pranueshëm për pjesën më të madhe të parlamentit. Pranohet edhe nga misioni i BE dhe ambasada e SHBA në Shqipëri, DASH, në Bruksel, KE dhe PE si dhe për zonjën Merkel e krerët e shumë shteteve anëtare të BE. 
 
Nëse politikanët nuk bien dakord me njëri-tjetrin, duhen pyetur qytetarët. Pash sot disa përfaqësues të shoqërisë civile që qëndronin para Kuvendit, duke i kërkuar deputetëve të Kuvendit që të votojnë pro. Dhe unë kam shumë simpati për këta. Mendoj se do ishte ide e mirë që edhe Këshilli i Integrimit të jepte fjalën e vet para të mblidhet Kuvendi.
 
I kemi diskutuar çështjet e reformës me të gjitha grupet politike në Shqipëri. I kemi diskutuar me shumë ekspertë evropianë dhe të SHBA-ve e mendoj se tashmë ka ardhur koha për të vendosur. Nuk bëhet fjalë vetëm për ndryshim ligji. Dhe natyrisht do të thosha që për Shqipërinë do të ishte i rëndësishëm se nëse zbatimi i reformës do të bëhej siç duhej, ndryshimi do të ishte i madh. Ky ndryshim shpresoj të ndodhë ditën e enjte.
 
Në Shkodër iu thash studentëve se pas pak javësh ata do të kishin mundësi të shikonin se kush e qeveris vendin e tyre. Shpresoj që ata të jenë krenar ditën e enjte që këtë e bën Parlamenti i Shqipërisë".
 
Z.Fleckenstein, çfarë garancish morët sot nga takimet me Ramën, Metën dhe Bashën? Si e shihni deklaratën e z.Meta, votojmë reformën e më pas qeveri teknike e zgjedhje?
Nuk mora asnjë garanci sot. Përshtypja që mu krijua është se ka vullnet të mirë, për të gjetur një kompromis të minutës së fundit për të gjetur zgjidhje për këtë çështje të vogël. Do ta shikojmë ditën e enjte këtë. E dëgjova me kujdes z.Meta dhe vlerësoj shumë dëshirën e tij që të gjendet një kompromis i minutës së fundit. Në Gjermani gjërat funksionojnë ndryshe, kush nuk është i kënaqur me qeverinë ata largohen dhe vendi shkon në zgjedhje. Në fakt, gjëja më e mirë është të pyesni z.Meta, pasi me sa kuptova unë ai është i gatshëm të ndihmojë në këtë proces.
 
Kryetari i Kuvendit foli dje edhe për destabilitet. Këmbëngulja juaj për të kaluar reformën, është një frikë e Brukselit nga rreziku i destabilitetit? Çfarë ju shqetëson konkretisht nga propozimi i PD?
Kjo ka qenë një kërkesë e PD. Dhe tani pyetja është si do të bëhet kjo gjë në procesin e zbatimit. Ne presim  të shikojmë rezultate në datën 21 korrik. Elmar Brok, kryetari i Komisionit të Jashtëm në PE, na ka kërkuar që të shkojmë në Bruksel nesër në një mbledhjen të jashtëzakonshme, 2-3 ditë para votimit të reformës në drejtësi, për të parë se si është situata. Për pyetjen e parë është e vështirë për mua ta gjykoj. Të mos votosh reformën në drejtësi, është një stabilitet që mua nuk më pëlqen. Ky është një stabilitet që mbështet korrupsionin dhe elementët që ne duam t'i shmangim. Në fakt, mesazhi përsa i përket Brukselit është tejet i qartë: jepeni tani, bëni përpjekjet e fundit për të arritur diçka, votoni ditën e enjte dhe çdo deputet i Kuvendit shqiptar të ndjekë ndërgjegjen e vet.
 
A keni përshtypjen se politikanët shqiptarë e kanë të qartë se çdo të thotë të mos e votojnë reformën?
Mendoj se është e qartë për ta. Ne kurrë nuk i kemi lënë gjërat të paqarta. Por tani ata do të duhet të tregojnë se çfarë mendojnë ata, cila është përgjigja e duhur për këtë çështje. Unë mund t'iu them një gjë, që ky proces nuk është i lehtë, apo i thjeshtë. Ky lloj procesi është bërë në mënyra të ndryshme në vendet Balltike dhe vendet Lindore të BE, edhe Shqipëria duhet të gjejë mënyrën e duhur dhe të tregojë të ecë drejt BE. Ne mund të themi që jemi të kënaqur, të pakënaqur, të zhgënjyer apo jo, por në fund të fundit ky mbetet një vendim i Kuvendit të Shqipërisë, për atë sesi e shikojnë ata të ardhmen e vendit. Ju në fakt i dini fare mirë thashethemet rreth e rrotull, por ajo që dua të shoh është, është të shoh votën e 140 deputetëve të Kuvendit të Shqipërisë, sesi do të jetë ajo. Të vazhdojmë të jemi optimistë deri në momentin e fundit.
 
Thatë që jeni optimist. Sot ka një takim, nëse të enjten ka një votim surprizë, kundër pra, çfarë do të ndodhë në 22 Korrik?
Unë do të thosha që ky do të ishte një zhgënjim i madh. Vërtetë i madh, jo vetëm në Bruksel, por edhe në kryeqytetet e vendeve anëtare të BE. Është pak a shumë jo e sigurt, por nuk do të jetë e mundur çelja e negociatave për anëtarësim në BE. Dhe në fakt, pas pushimeve të verës, ne do të kemi biseda shumë të hapura me të gjithë ata që kanë qenë përgjegjës për këtë gjë. I uroj fat Shqipërisë.

Redaksia Online
l.q/Shqiptarja.com