Forumin Urban të Marmarasë në Turqi, Sako: Prezantova vlerat e rralla të Durrësit

Kryetarja e bashkisë së Durrësit Emiriana Sako ka zhvilluar një vizitë zyrtare dy ditore në Turqi, ku ka marrë pjesë në Forumin Urban të Marmarasë në Stamboll.

Ky forum është një event ndërkombëtar mjaft i rëndësishëm ku marrin pjesë universitetet, grupet e interesit dhe përfaqësues nga politika si kryetarë bashkish dhe zyrtarë të lartë nga shumë shtete të botës.

Në një sesion special të këtij forumi kryebashkiakja e Durrësit, Emiriana Sako, ka prezantuar tek të pranishmit vlerat historike si dhe potencialin e jashtëzakonshëm turistik e ekonomik të Durrësit.

Gjithashtu në këtë panel ajo diskutoi edhe për sfidat që kaloi Durrësi pas dy fatkeqësive që e goditën rëndë atë siç ishin tërmeti dhe pandemia, për programin e rindërtimit dhe punën e madhe që është bërë në bashkëpunim të ngushtë me qeverinë shqiptare për ringritjen e qytetit.

Në lidhje me një nga temat kryesore që ishte sfida e grave në lidership si dhe mbështetja ndaj gruas, kryebashkiakja Sako foli mbi rritjen e ndjeshme të përfaqësimit të gruas në vendimmarrje në të gjithë vendin por veçanërisht në Durrës si dhe punën që bën bashkia e Durrësit me fokus gratë dhe fëmijët ku vetëm në 3 vitet e fundit kjo bashkia ka hapur 3 qendra të cilat ofrojnë shërbime për gratë e dhunuara, për fëmijët apo për emigrantët e kthyer në Durrës ndërkohë që po punohet për të hapur një tjetër qendër, atë të reziliencës e cila do ti shërbejë fuqizimit ekonomik të gruas nëpërmjet nxitjes së punësimit.

Në mbyllje të fjalës së saj në këtë forum kryebashkiakja Sako i njohu të pranishmit edhe me projektet e mëdha që po zhvillohen të cilat po e transformojnë Durrësin në një qytet turistik evropian.

M.T/r.k./Shqiptarja.com

TAG:
• turqi
• Durres
• Emiriana Sako