FOTO/Pas debateve në Kuvend
deputetët e PD, kafe me Ramën

Debatet e herëpashershme mes deputetëve në Kuvend, ndër to edhe të ashpra duke moskursyer as fyerjet personal, jo gjithmonë pasqyrojnë raportet e vërteta ndërmjet tyre. 

Gjatë seancës, deputetët e opozitës debatuan ashpër me Kryeministrin Edi Rama për reformën në arsimin e lartë dhe kultivimin e kanabisit, duke hedhur edhe akuza direkte. 

Ndërsa pak çaste pas debateve, tre deputetë të PD shihen teksa konsumojnë kafe në ambientete e kafenesë së Kuvendi në shoqërinë e Kryeministrit Edi Rama.

Rama është parë në një tavolinë me deputetët Luçiano Boçi, Bedri Mihaj dhe Asllan Dogjani. Të katër sëbashku konsumojnë të qetë kafenë, ndërsa nuk shihen aspak të tensionuar nga debati në seancë.

Ky moment tregon edhe njëherë tjetër se sa serioze është opozita dhe PD në sulmet e përditshme ndaj kryeministrit Rama dhe qeverisë, të cilat i përdorin sa për konsum mediatik e politik sëbashku. 


(Edi Rama, Bedri Mihaj, Asllan Dogjani dhe Luçiano Boçi duke konsumuar kafe)

Justifikohet Asllan Dogjani: Rama erdhi i paftuar në tavolinë
Deputeti i Partisë Demokratike, Asllan Dogjani, ka justifikuar uljen e tij bashkë me tre kolegë të tjerë të PD, në një tavolinë me Kryeministrin Edi Rama.

Nga foltorja e Kuvendit, Dogjani tha se ai i ka ngritur Kryeministrit shqetësimin e helmimit të nxënësve të Paskuqanit nga kanabisi.  

"E vazhduam debatin këtu me kryeministrin, por edhe në kafen e Parlamentit që erdhi dhe u ul aty, megjithëse nuk ishte i ftuar. E vazhduam debatin dhe i thashë që, në Paskuqan është djegur drogë. Unë kam qenë ai që kam dhënë lajmin këtu në këtë sallë parlamenti", deklaroi Dogjani.

 Redaksia Online
l.q/Shqiptarja.com