Prej një dekade pedagoge në Gjermai, por pasionin (dhe profesion) për fotografinë Elisa Berdica e bën urë komunikimi për të promovuar përmes imazhit vlera humane e turistike të vendit të saj. E nisi me vendlindjen e saj, Shkodrën, ku është rikthyer këto ditë, për të prezantuar në galerinë “ODA” fotografitë më të fundit, të realizuara në kuadër të projektit ‘Ruralb’, që ka në fokus njerëzit e zakonshëm, punën e fshatit, probleme sociale por edhe ekonominë e brishtë të njerëzve ‘përtej gardhit’ të jetës në qytet.
Berdica tenton që përmes imazheve të saj, jo vetëm të komunikojë histori, por edhe të ndërgjegjësojë për problemet reale që prekin njerëzit që jetojnë në zonat rurale të vendit tonë.
Elisa Berdica ka lindur në Shkodër në vitin 1987. Pas përfundimit të doktoraturës në Psikologji Klinike dhe Psikoterapi, ajo vazhdon të punojë në Universitetin e Mannheim, Gjermani, si lektore dhe fotografe me fokus fotografinë dokumentare.
