VLORË- Pas përmbytjeve të 4 tetorit që paralizuan Vlorën dhe sollën dëme të mëdha, institucionet kanë nisur pastrimin e kanaleve, por po punojnë me hapa të ngadaltë. Aktualisht janë angazhuar punëtorët e Ndërmarrjes së Shërbimeve Publike në Bashki dhe Shoqërisë Rajonale të Ujësjellës-Kanalizime Vlorë.

Report Tv kreu një vëzhgim në lagjen 'Pavarësia', aty ku kalon kanali i 'Siavit', i cili cilësohet ndër të rëndësishmit e grumbullimit të ujërave të bardha apo thënë ndryshe të shiut.  Siç shihet në pamje kanali është i tejmbushur me mbetje urbane dhe vegjetacion, ç’ka dyshohet se solli përmbytjen në këtë lagje.

Ndërsa Njasim Habibaj një ish-punonjës i ndermarrrjes së Bonfikimit shprehet se kanalet kulluese duhen pastruar gjatë verës, dhe jo tani që ka nisur stina e reshjeve. Sipas tij ëshë përgjegjësi e instucioneve lokale t’i paraprijnë rrezikut.

Vendi ynë pritet të përfshihet nga reshjet e dendura të shiut nga e mërkura e kësaj jave ndaj banorët e lagjes “Pavarësia”, i druhen përmbytjeve. Ata kanë mbushur hyrjet e garazheve me thasë rëre.

Nga përmbytjet e 4 tetorit në Vlorë, u dëmtuan 352 banesa dhe 80 biznese, pronarët e të cilave ende nuk kanë marrë dëmshpërblim edhe pse janë kryer vlerësimet nga Bashkia e Vlorës.