Futbolli në zi, shuhet legjenda 
Johan Cruyff, vuante nga kanceri

Bota e futbollit është në zi. Në moshën 68-vjeçare ka ndërruar jetë legjenda e futbollit holandez Johan Krujf.

Kampioni i botës së futbollit vitet e fundit vuante nga një sëmundje e rëndë nga kanceri. Ai kishte deklaruar se do e fitonte edhe këtë betejë por në fund ishte sëmundja ajo që triumfoi.

Lajmi për ndarjen nga jeta të Johan Krujf jepet edhe në sajtin e tij zyrtar ku thuhet:

“Johan Krujf ka ndërruar jetë në Barcelonë në moshën 68-të vjeçare pas një beteje me kancerin”.

Krujf ka qenë një nga futbollistët më të mëdhenj por edhe një trajner që bëri epokë. Ai është edhe tre herë fitues i Topit të Artë. 

Kush ishte Johan Cruyff
Johan Cruyff lindi në Amsterdam në 25 prill 1947. Si futbollist Cruyff luajti 12 sezone në kampionatin holandez duke shënuar 223 gola në 307 ndeshje, 6 sezone në kampionatin spanjoll, me 48 gola në 140 ndeshje dhe në kampionatin e SHBA me 25 gola në 53 ndeshje. Me Kombëtaren Holandeze zhvilloi që nga 1966 deri në 1977, 48 ndeshje duke shënuar 33 gola  si dhe ishte finalist në Botërorin e paharrueshëm të 1974.

Si futbollist fitoi një Kupë Interkontinentale, 1 Superkupë të Europës, 3 Kupa Kampionësh, 9 kampionate të Holandës dhe 1 kampionat të Spanjës, duke i shtuar këtu edhe vlerësimet individuale me 3 Topa të Artë.

Si trajner Cruyff udhëhoqi Ajaksin duke fituar 1 Kupa të Holandës dhe 2 Kupa të Kupave, Barcelonën me të cilën fitoi 4 kampionate të Spanjës, 1 Kupë të Spanjës, 1 Kupë Kupash, 1 Kupë Kampionësh dhe Superkupën e Europës. 

Prej ditës së sotme ai nuk jeton më, por historia që ka lënë pas është një burim frymëzimi për brezat pasardhës. 

Johan Cruyff ishte babai i tre fëmijeve.

Redaksia Online
Shqiptarja.com