Gërdeci, prokuroria apelon
vendimin  e gjykatës së Tiranës

TIRANE- Prokuroria e Tiranës s'tërhiqet nga vendimi i saj për të dënuar me burgim përjetë tre të pandehurit kryesorë të tragjedisë së Gërdecit Mihail Delijorgji, Dritan Minxollin dhe Ylli Pinarin. Prokurorët e çështjes Gërdeci, paralajmërojnë se shumë shpejt do apelojnë vendimin, duke i kërkuar gjykatës së Apelit që të lerë në fuqi masën e dënimit të kërkuar prej tyre në gjykatën e Shkallës së Parë. Ata do i drejtohen sërisht gjykatës me të njëjta kërkesa për 29 të pandehurit e dosjes Gërdeci, duke argumentuar me detaje dhe rrethanat se përse duhet të dënohen për akuzën e vrasjes masive tre personat e sipërcituar. Në një prononcim për gazetën "Shqiptarja.com" prokurorët e dosjes Gërdeci thanë se edhe pse Gjykata e Tiranës nuk arin ta përpilojë vendimin brenda afatit të caktuar, ata do i drejtohen gjykatës së Apelit ku do kërkojnë zëvendësimin e masave të dënimit thuajse për të gjithë të pandehurit. "Ne kemi nisur që dje të mendojmë për një gjë të tillë. Madje për këtë kemi zhvilluar një takim edhe me kryeprokureren Ina Rama, ku kemi diskutuar lidhur me masat e dënimit që do kërkojmë në gjykatën e Apelit. Normalisht që në 95 përqind, do i qëndrojmë besnik dënimeve të kërkuara gjatë dhënies së pretencës"-shprehen burimet pranë prokurorisë së Tiranës. Vendimi i dhënë nga treshja e gjykatësve Ridvan Hado, Fatmira Hajdari dhe Shefkie Demiraj ka lënë të pakënaqur dhe të pandehurit e këtij procesi gjyqësor. Pjesa më e madhe tyre, paralajmëruar se do i drejtohen gjykatës së Apelit, ku do kërkojnë pafajësin, pasi sipas tyre ata nuk janë autorë të asnjë vepre penale që prokuroria ka ngritur në ngarkim të tyre. Në fazën e gjykimit në themel, të gjithë të pandehurit i kërkuan gjykatës së Tiranës pafajësi, ndërkohë që gjykata shpalli të pafajshëm vetëm 8 prej të pandehurve. Vendimi solli iritimin e familjarëve të viktimave të Gërdecit, ku Zamira Durdaj nëna e Edison Durdës 6 vjeçarit të vrarë në 15 mars, shpërtheu në mallkime dhe britma duke iu drejtuar prokurorëve dhe gjyqtarëve me fjalët Turp, Turp, Turp.
(eq/shqiptarja.com)