Gabriel Escobar takon Abazoviç: Mali i Zi duhet të zgjidhë ngërçin politik në të cilin është gjendur

MALI I ZI- I dërguari Special i Shteteve të Bashkuara të Amerikës në Ballkanin Perëndimor, Gabriel Escobar ka zhvilluar një takim ditën e sotme me kryeministrin e Malit të Zi. 

“Ne ndajmë pikëpamjen se Mali i Zi duhet të zgjidhë ngërçin politik në të cilin është gjendur, të mbetet i përkushtuar në rrugën euroatlantike dhe të kundërshtojë qartë agresionin brutal të Rusisë kundër Ukrainës”, tha i dërguari special i SHBA-së për Ballkanin Perëndimor, Gabriel Escobar.

Lajmi u bë i ditur nga Ambasada Amerikane pas takimit të Escobarit me kryeministrin në mandat teknik Dritan Abazoviç, i cili u zhvillua në ndërtesën e Qeverisë së Malit të Zi.

Kujtojmë se takimi vjen pasi në vend pati protestë të dhunshme me miratimin nga Parlamenti i Malit të Zi në ndryshimin e Ligjit për Presidentin.

Miratimi i Ligjit për Presidentin bie ndesh me rekomandimin e Komisionit të Venecias, i cili të premten tha që të “mos miratohen ndryshimet në Ligjin për Presidentin e Malit të Zi, pasi ato në thelb do të përfaqësonin një ndryshim të Kushtetutës, me një shumicë më të vogël parlamentare se sa parashikohej”.

Muajin e kaluar, organizatat pro-malazeze dhe partitë opozitare filluan protesta anti-qeveritare në Podgoricë, duke kërkuar zgjedhje, zhbllokimin e gjykatës dhe tërheqjen e një ligji që frenon pushtetin e presidentit për një kohë të gjatë të Malit të Zi, Milo Gjukanoviç.

Mali i Zi është anëtar i NATO-s dhe kandidat për t'u anëtarësuar në Bashkimin Evropian.

Politika në republikën e vogël ballkanike me vetëm 625,000 banorë është shënuar prej kohësh nga një përçarje midis atyre që identifikohen si malazezë dhe atyre që e shohin veten si serbë dhe kundërshtojnë pavarësinë e Malit të Zi nga një ish-bashkim shtetëror me Serbinë fqinje dhe shumë më të madhe.

S.C/Shqiptarja.com

TAG:
• mali i zi
• Dritan Abazovic
• Gabriel Escobar
• Gabriel Escobar