Nis faza e tretë e vlerësimit të kandidatëve që kanë aplikuar për procedurën e konkurrimit për hetues financiar pranë Prokurorisë së Posaçme Antikorrupsion. Pjesë e garës është edhe Ditmir Hoda, djali i Zeqir Hodës anëtar në Këshillin e Lartë të Prokurorisë, i cili është edhe pjesë e 11-shes që voton për katër kandidatët në garë për pozicionin drejtues në SPAK.

Mbledhjen e kaluar në KLP, Hoda u tërhoq nga votimi për miratimin e listës së kandidatëve për drejtues të SPAK, për shkak të një shkrimi lidhur me kandidimin e djalit të tij si hetues financiar, ku u pretendua se pjesë e komisionit ishte prokurori Klodian Braho, njëherësh kandidat për drejtues të SPAK. Për këtë arsye, Hoda u tërhoq nga votimi.

Pavarësisht aludimeve për prezencën e Klodian Brahos në komisionin e Përzgjedhjes së Hetuesve Financiar, në Sektorin e Hetimit Financiar, në Prokurorinë e Posaçme, burime bëjnë me dije se ky i fundit është tërhequr nga komisioni në datën 6 tetor, ditën që ka dorëzuar platformën në Këshillin e Lartë të Prokurorisë për vendin vakant të drejtuesit të SPAK.

Vlerësimi i kandidatëve për hetues financiar do të bëhet nga prokurorët Sotir Kllapi, Dorina Bejko dhe Dritan Prençi. Ky i fundit zëvendësoi Brahon pas dorëheqjes.

Në fazën e tretë të konkurrimit do të marrin pjesë  10 kandidatë, për 4 vende vakante, të cilët kanë grumbulluar mbi 40 pikë.

Intervista e strukturuar me gojë me kandidatët për hetues financiarë, në Sektorin e Hetimit Financiar do të zhvillohet këtë të enjte, në datën 23.10.2025, në godinën e SPAK, dhe garuesit do të njoftohen individualisht për orën e caktuar për zhvillimin e intervistës. Kandidatët njoftoi SPAK, që në dy fazat e para të konkurrimit nuk kanë grumbulluar minimum 40 (dyzet) pikë do të njoftohen individualisht për rezultatet e tyre.  

Emri dhe Mbiemri                             Faza e I-Jetëshkrimi       
1.            Enea Arben Sharra              56 pikë
2.            Ermal Niazi Milori                 52 pikë
3.            Argjend Shefki Tota              48 pikë
4.            Kreshnik Thimi Gjeçka        45 pikë
5.            Gentian Nikollë Ndoi           44 pikë
6.            Ditmir Zeqir Hoda                43 pikë
7.            Ilir Bexhet Deda                  43 pikë
8.            Fotion Përparim Malaj         42 pikë
9.            Klodian Nikolet Vasia          41 pikë
10.         Lutfi Haxhi Minxhozi             41 pikë