Gara, Selami: PD në gjendje kritike,
duhet të respektojë rregullat e lojës

Kandidati Eduard Selami gjatë takimeve në bazë, në Lezhë, Rrëshen, Lac, Fushë Krujë, dhe Krujë theksoi se gara për kryetar të PD, do ti nxjerrë demokratët më të fortë dhe më të bashkuar.
 
Duke shtjelluar platformën e tij, kandidati Selami tha se ajo pasqyron gjithë problematikën dhe zgjidhjet për gjendjen kritike të PD pas humbjes në 25 Qershor.
 
Duke u përqendruar te ajo që ai e cilësoi rikthimi te vlerat demokratike si, respektimi i Statutit, dëgjimi i strukturave, këshillimi me bazën dhe konkurrenca e drejtë per të promovuar njerëzit më të aftë për karrierën në parti, Selami tha se vendosja e sistemit te meritokracisë eshtë e një rëndësie themelore për PD dhe për rolin aktiv të qytetarëve.
 
Ka ardhur koha, tha ai, qe rregullat e lojës të respektohen që Partia Demokratike të përfaqësojë realisht interesat e demokratëve, që janë interesat e gjithë shqiptarëve.
 
"Besoj që së bashku jo vetëm do ta kthejmë PD në parti fituese, do ta kthejmë Shqipërinë edhe një herë në rrugën e suksesit, jo vetëm rajonal por edhe më gjerë.
 
Demokratët do të fitojnë dhe do të rikthehen po aq fuqishëm sa edhe në vitin 92. Unë kam besim absolut se demokratët janë forca më progresive e Shqipërisë që gjeneron sukses edhe progres dhe këtë e kanë dëshmuar faktet.

Prandaj, kjo më bën mua kaq krenar që jam demokrat dhe unë jam këtu që me energjine tonë, tia dalim dhe në këtë sfidë të ringritjes së PD” tha Selami.
 
Selami tha se PD është forca politike e alternativave dhe e energjisë më të madhe të shqiptarëve, që rrëzoi totalitarizmin e komunizmit, që ngriti forcën e shtetit ligjor dhe siguroi integrimin euroatlantik të Shqipërisë. 

Zgjedhjet për kreun e ri të PD do të zhvillohen në 22 korrik dhe Selami garon përballë Lulzim Bashës.


dy.b/shqiptarja.com