Gazetari Artur Çani: Tentuan të më 
vrasin, policia sekuestron pamjet

TIRANË - Gazetari Artur Çani ka kallëzuar në polici se një person ka tentuar që ta vrasë, në hyrje të pallatit të tij. Ndërsa shprehet se ai nuk e ka vënë re një gjë të tillë, Artur Çani tregon se ka parë atë çfarë ka ndodhur te kamerat e sigurisë së pallatit, pasi një djalë i pallatit i kishte thënë se kishte parë një person me pistoletë.
 
Ndërsa mësohet se policia ka sekuestruar pamjet filmike të pallatit, por edhe të zonës përreth për të zbardhur atë se çfarë ka ndodhur, në njoftimin e policisë thuhet se ngjarja ka ndodhur rreth orës 20.30, në rrugën “Faik Konica” në Tiranë.


(Në Foto: Njoftimi i policisë për kërcënimin ndaj Artur Çanit)

Gazetari Artur Çani shprehet se personit që ka dashur ta vrasë i është bllokuar arma herën e parë, ndërsa kur ka tentuar të qëllojë për herë të dytë ai kishte hyrë në ashensor.

Pasi ka parë pamjet Çani bën me dije se ka kontaktuar mbrëmë me ministrin Tahiri, për t’i treguar rreth ngjarjes.

PD: Prokuroria të hetojë ngjarjen e të verë para drejtësisë porositësit
Partia Demokratike ka reaguar pas denoncimit të ngjarjes se ndaj gazetarit Artur Çani ishte organizuar një atentat. Në një deklaratë për mediat, zëdhënësja e kësaj force politike, Oriola Nebijaj tha se PD i kërkon prokurorisë të hetojë shpejt e të vërë para ligjit autorët e porositësit e atentatit ndaj gazetarit Çani.
 
Nisur nga ngjarja, PD ka akuzuar qeverinë Rama për mungesë të sigurinë në vend dhe forcim të bandave mafioze.

 
Redaksia Online
(a.h/shqiptarja.com)