Gecaj: Pacientët në QSUT
hyjnë me 1 sëmundje marrin 2

TIRANE- Kushtet higjieno- sanitare të QSUT-së, janë shumë larg standardeve të një spitali. Ky ka qenë konstatimi paraprak i specialistëve të higjienës së Tiranës, të cilët duke filluar nga data 22 dhjetor po bëjnë një kontroll të detajuar në QSUT. Mhill Gecaj, kreu i Drejtorisë së Higjienës ka thënë se ende nuk ka një raport përfundimtar, por të dhënat paraprake kanë nxjerrë në dritë mjaft probleme për higjienën.

“Eshte absurde që  pacientët futen me një sëmundje dhe dalin me dy, sepse marrin infeksion spitalor', - ka deklaruar Gecaj për “Shqiptarja.com” duke shtuar se një situatë e tillë nuk do të tolerohet më.

 Një tjetër shqetësim madhor për inspektorët e Higjienës janë lokalet e shumta në spital. Një mjek del nga salla e operacionit, me bluzë të bardhë, me këpucët që përdor në sallën e operacionit dhe shkon direkt e ulet në këto lokale. Dhe pastaj me po të njëjtën veshje, futet sërish në sallën e operacionit. Në fillim të janarit do të ketë një raport të detajuar me të gjitha mangësitë e konstatuara, që do t'i çohen drejtorisë së QSUT-së dhe ministrisë së Shëndetësisë.