Gjenden një pjesë e mostrave të Astrit Deharit, studentit ekselent nga Kosova dhe aktivistit të Vetëvendosjes që vdiq në rrethana misterioze  

Gazeta Nacionale ka mësuar se janë gjetur një pjesë mostrave të ish-aktivistit të VV-së, Astrit Deharit, të cilat ishin zhdukur në dhjetor të vitit të kaluar.

Një burim brenda Institutit të Mjekëses Ligjore(IML), ka treguar për gazetën se mostrat janë kthyer aty ku kanë qenë më herët.

“Janë gjetur disa mostra të Astrit Deharit. Ato janë gjetur në objekt dhe janë kthyer aty ku kanë qenë më herët”, ka thënë burimi

LEXO EDHE:
Petkoviç: Prishtina s’më lejoi të vizitoj veriun e Kosovës

Më tej, burimi ka treguar se për cilat mostrat bëhet fjalë.

“Mostrat që janë gjetur janë të lukthit dhe të urinës. Kurse të gjakut mungojnë. Prokuroria sot ka qenë këtu dhe i ka marrë provat e nevojshme”, ka thënë i njëjti burim.

Mostrat e Astrit Deharit, ish-aktivistit të VV-së, janë zhdukur në dhjetor të vitit kaluar.

Në një konferencë për media, ajo kishte thënë se menjëherë ka njoftuar prokurorinë për rastin.

“Duke pasur parasysh ndjeshmërinë rastit, mbrëmë në orët e vona jam njoftuar që janë zhdukur mostrat e Astrit Deharit, nga laboratori, kam njoftuar ushtruesin e kryeprokurorit Besim Kelmendi. Në rasat e epruveta kanë qenë 15 epruveta me gjakë, një e urinës dhe një epruvetë e lukthit”, ka thënë Haxhiu.

Ajo kishte treguar se në atë hapësirë qasjen e njerëzve ishte e kufizuar.

“Ky akt është vërejtur dje gjatë bartjes së mostrave nga frigoriferët e vjetër në frigoriferët e rinj, por jam e bindur se ka qenë çështje kohe që ata që e kanë orkestruar do ta plasonin si një veprim dëmtues të procesit në tërësi” ka thënë ministrja.

Zhdukja e mostrave kishte nxitur reagime të shumta në vend.

Ministrja e Drejtësisë kishte suspenduar katër zyrtar të IML-së për këtë çështje, ndërsa prokuroria kishte nisur hetimet, duke intervistuar njerëz.

Në muajin e kalua Prokuroria Speciale e Kosovës kishte deklaruar se një numër i konsiderueshëm i personave janë intervistuar në cilësi të dëshmitarëve, për rastin e zhdukjes së mostrave të Astrit Deharit.

“Ndërkaq, për rastin e zhdukjes së provave në çështjen Dehari, ju njoftojmë se Prokuroria Speciale e Republikës së Kosovës, ka intervistuar një numër të konsiderueshëm të personave në cilësi të dëshmitarëve. Po ashtu, ju informojmë se kemi ndërmarr veprime konkrete që do të na ndihmojnë në rrjedhën e procedurës të mëtutjeshme hetimore. Për momentin nuk kemi ende persona të dyshuar në këtë çështje”, kishte thënë zëdhënësi i Prokurorisë Speciale të Kosovës, Ekrem Lutfiu.

Zhdukjen e këtyre mostrave edhe më dramatike e kishte bërë deputeti i VV-së, Haki Abazi.

Në një konferencë për medie, ai kishte deklaruar ka video-incizime që dëshmojnë se kush i ka zhdukur mostrat e Astrit Deharit në Institutin e Mjekësisë Ligjore.

“Audio-incizimet konfirmojnë diskutimin ndërmjet Saranda Bogujevcit, Mimoza Kusarit e Dejona Mihalit për ngulfatjen e zërit të deputetëve brenda Kuvendit. Video-incizimet janë ato që ju duhet t’i kërkoni për të konfirmuar se kush ka zhdukur mostrat e Astrit Deharit”, kishte thënë Abazi.

Për këto pretendime, deputeti Abazi ishte intervistuar nga prokuroria.

Dy vite më parë, Kosova u trondit me një vdekje e cila ende sot vazhdon të jetë një mister.

Një mister, që është shndërruar në një fantazmë që ndjek shtetin e Kosovës dhe trazon të gjallët që jetojnë në këtë vend.

Misteri i vdekjes së Astrit Deharit në qelinë e paraburgimit me 5 nëntor 2016 është në duart e një Instituti në Zvicër, vendi nga ku Astrit Dehari e kishte braktisur për të jetuar në Kosovë, qysh në vitin 2000./Nacionale

G.MO/Shqiptarja.com

TAG:
• astrit dehari
• kosove