Gjesti fisnik i kuqezinjve për fëmijët jetimë në Durrës...Momentet emocionuese (VIDEO)

Nesër është 1 Qershori, dita e fëmijëve. Por jo të gjithë kanë mundësi të jenë krah prindërve të tyre. Për të sjellë sadopak gëzim në Shtëpinë e Foshnjes në Durrës, ekipi i kombëtares shqiptare të futbollit, i bënë një surprizë fëmijëve.

Jo vetëm dhuruan mjete të domosdoshme dhe në nevojë që kishte Shtëpia e Fëmijës në qytetin e Durrësit, por edhe kaluan momente argëtuese me fëmijët, duke u bërë njësh me ta teksa kërcenin muzikën me personazhet e preferuar të fëmijëve.

Trajneri Reja, së bashku me ndihmësit Bulku, Salihi, Porrini, dhe lojtarët Berisha, Mavraj, Hysaj, Lenjani, Cikalleshi dhe Roshi shpërndanë dhurata për të gjithë fëmijët. Me kontributet e të gjithë lojtarëve ishin blerë disa pajisje elektro-shtëpiake që ndihmojnë sadopak në përmirësimin e kushteve për fëmijët e kësaj shtëpie.

Në një atmosfere festive lojtarët dhe stafi teknik iu bashkuan fëmijëve të cilët kishin përgatitur një festë për 1 Qershorin. Ishte shumë emocionuese dashuria e vogëlushëve kur u takuan me mysafirët e kësaj qendre.

"Është një lumturi e madhe të jepet mundësia të gëzosh fëmijën. Në këtë jetë që e kemi me vështirësi është një mundësi e mirë për të realizuar se për fare jetojmë. Fëmijët janë të ëmbël, por këto vajza që punojnë me këta fëmijë janë hero, është një arritje shumë e madhe të kemi edukatore të tilla si në këtë jetimore", u  shpreh futbollisti Mërgim Mavraj.

Në pemën e dëshirave, fëmijët vendosën edhe ëndrrat e tyre, atë se çfarë dëshirojnë të bëhen kur të rriten. Policë, shoferë dhe nuk mund të mungonin as futbollistët e së ardhmes.

G.M./r.k./Shqiptarja.com

TAG:
• kombetarja
• Durres
• Futbollist
• femijet jetime
• 1 Qershori
• Edy reja