Gjirokastër, PD bllokon aksin
nacional, sensibilizim për rregullim

Demokratët gjirokastritë, kanë reaguar ndaj indiferencës së Bashkisë së Gjirokastrës, rreth rrugëve të shkatërruara që ka ky qytet në brendesi dhe jashtë tij. Për gati 5 minuta, automjetet me simpatizantët e PD, kanë bllokuar arterien kryesore që lidh Gjirokastrën me aksin nacional Gjirokastër-Kakavije duke paralajmëruar përshkallëzimin e tyre nëse Bashkia apo dhe Drejtoria e Përgjithshme e Rrugëve, nuk do të ndërhyjnë, për të përmirësuar zonën në fjalë e cila i përngjan më tepër një situate lufte me rrugë të dëmtuara dhe aspak të rehabilituara nga ana e pushtetit vendor. 

Në krye të aksionit opozitar, kanë qenë të rinjtë e FRPD si dhe kreu i PD për Gjirokastrën, Roland Bejko. Ky i fundit ka apeluar tek autoritetet më të larta shtetërore qëndrore dhe lokale, që të ndërhyjnë me urgjencë në rregullimin e situatës pasi në të kundërt, reagimi do të jetë më ekstrem.

Mjaft herë dega lokale e PD në Gjirokastër, është bërë protagoniste e sensibilizimit të problemeve që shqetësojnë komunitetin në qytet si uji i pijshëm, infrastruktura rrugore, pyjet, kullotat si dhe subvencionimet në bujqësi që janë dhënë sipas preferencave politike të LSI. 

Redaksia online
(S.m/.shqiptarja.com)