Gjyqi Meta-Prifti, Gjykata
refuzon provat e prokurorisë

TIRANË – Gjykata e Lartë nuk ka pranuar hapjen e videos së re, që sipas prokurorisë së përgjithshme ndodhet në laptopin ku është regjistruar biseda Meta – Prifti.
Sipas gazetarit të Shqiptarja.com, i cili ka ndjekur procesin gjatë ditës së sotme, trupit gjykues nuk ka pranuar asnjë prej 3 provave të reja të sjella nga organi qendror i akuzës. Pas kërkesës së prokurorëve për të hapur një video të re, të paprekur më parë, trupi gjykues u tërhoq për më shumë së 2 orë për marrjen e vendimit. Në orën 13: 15 trupa ka dhënë vendimin se nuk pranohej asnjë prej provave të reja të prokurorisë ku përfshihej:
1. Video e re, e zbërthyer më parë në laptop
2. Transkriptimi i intervistës së ish ministrit Prifti në emisionin “Top Story” në 3 janar 2011.
3. Transkriptimi i bisedës me oficerë të policisë gjyqëore transmetuar në emisionin “Fiks Fare”

Pavarësisht këmbënguljeve të prokurorëve, trupa gjyqësore nuk ka dhënë asnjë argument mbi arsyet pse refuzoi marrjen e provave të reja për gjyqin ndaj Ilir Metës.


GJYKATA E LARTË PRANON PROVAT E AVOKATËVE
Ndryshe nga ajo çfarë ndodhi me provat teknike të Prokurorisë së Përgjithme, Gjykata e Lartë ka pranuar të gjitha provat e sjella nga avokatet mbrojtës të Ilir Metës, kundër ish ministrit Dritan Prifti.
Kështu, në seancën e sotme, avokatët mes të tjerash kanë paraqitur si prova materiale edhe dokumenta, të cilat sipas tyre, tregojnë se Prifti ka favorizuar lejet për kompanitë të cilat figurojnë në pronësi të gruas dhe dajës së tij.