Philadelphia (SHBA) - Chelsea ka pësuar një humbje të hidhur në fazën e grupeve të Kupës së Botës për Klube, duke u mundur me rezultatin 3-1 nga Flamengo, në një sfidë ku skuadra londineze e nisi mirë, por 'u shemb' në pjesën e dytë. Me këtë sukses të brazilianëve dhe fitoren 0-1 të Esperance kundër Los Angeles, Flamengo kalon në 1/8 e Kupës së Botës për Klube.

NDESHJA - Blutë e Chelsea kaluan në epërsi që në minutën e 13-të, kur Pedro Neto shfrytëzoi një gabim në mbrojtjen braziliane dhe realizoi për 1-0, rezultat me të cilin u mbyll pjesa e parë.

Pjesa e dytë ishte një makth për skuadrën angleze. Bruno Henrique barazoi në minutën e 53-të pas një kombinimi me Platas, ndërsa vetëm tre minuta më vonë, ishte Danilo që përmbysi gjithçka për Flamengon, këtë herë me Bruno Henrique në rolin e asistuesit.

Katastrofa për Chelsean u plotësua me kartonin e kuq të Nicolas Jackson në minutën e 68-të, vetëm katër minuta pasi u fut në lojë, për një ndërhyrje të rëndë ndaj kundërshtarit.

Me një lojtar më shumë në fushë, Flamengo dominoi totalisht dhe gjeti edhe golin e tretë me anë të Wallace Yan në minutën e 83-të, duke vulosur fitoren e dytë radhazi në grup.

Pas kësaj ndeshjeje, Flamengo ngjitet në vendin e parë të Grupit D me 6 pikë, Chelsea ka 3, ndërsa Esperance Tunis 3 dhe Los Angeles FC mbeten me 0 pikë.

Chelsea do të kërkojë reagimin në sfidën e radhës ndaj Esperance Tunis, e cila do të zhvillohet pas pesë ditësh. Ndërkohë Flamengo kalon në 1/8 dhe ndeshja e radhës me Los Angeles FC duket si miqësore.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 22 Shkurt, 21:11

    A duhet ta miratojë Kuvendi kërkesën e SPAK për arrestimin e Ballukut?

Lajme të tjera