Ndarja e çmimeve Grammy në Staples Center të Los Angeles filloi me një homazh për Whitney Houston, këngëtaren 48-vjeçare që u gjet e vdekur të premten në një hotel të Beverly Hills.
 Këngëtarja britanike, Adele ishte ajo që triumfoi në mbrëmje duke fituar 6 çmime Grammy, mes të cilëve atë për këngën, singëllin dhe albumin e vitit me ‘Rolling in the Deep’, këngë që është pjesë e albumit ‘21’.
Këngëtarja ka falenderuar mjekët që e operuan në kordat vokale duke i bërë të mundur ngjitjen sërish në skenë. Mbrëmjen e djeshme u pa qartë se mjekët kanë bërë një punë të shkëlqyer: zëri i Adele është rikthyer.
Në kategorinë “rock” dominoi grupi Foo Fighters që me këngën e tyre ‘Walk’ marrin pesë çmime.
Fitues të tjerë (mbi 75 kategori për të cilët u ndanë çmime) ishin edhe Kanye Ëest dhe Jay-Z në kategorinë “rap”; Lady Antebellum për albumin më të mirë “country” me ‘Own the Night’; Taylor Swift për këngën e saj ‘Mean’; Bon Iver si artisti i ri më i mirë.
Mbrëmja e ndarjes së çmimeve Grammy u pasurua edhe nga performancat e artistëve si Paul McCartney, Rihanna, Chris Brown, Katty Perry, Kelly Clarkson etj.

Homazh për Whitney-n

Jeta dhe karriera e  këngëtares 48 vjecare, Whitney Houston-it u përkujtua në ceremoninë e çmimeve Grammy në Los Angeles.
Homazhet për ikonën  pop-it, përfshinë edhe një performancë të dedikuar asaj nga Jennifer Hudson. "I will always love you", këngës-hit që shënoi rekordin e vitin në 1994-tën në ndarjen e atëhershme të çmimeve Grammy, Hudson i bëri një ndryshim të vogël dhe e këndoi: "Whitney, we will always love you".

Whitney Houston u gjend e vdekur në dhomën e hotelit ku po qëndronte në Los Angeles, një ditë përpara ceremonisë prestigjoze. Ekzaminimi post-mortum nuk tregon shenja traume në trupin e këngetares. Sipas site-t TMZ, i pari që dha lajmin e vdekjes, Houston mund të jetë mbytur në vaske teksa bënte banjë.