Grataçela 28-katëshe në Golem do të prishet, pronari debat me hartuesit e relacionin

Pallati 28 katësh i ndërtuar pranë plazhit në zonë e Shkëmbit të Kavajës në Durrës pritet të shembet.  Kjo është bërë e ditur nga Instituti i Ndërtimit, inspektorët e të cilit rekomandojnë prishjen e kësaj ndërtese edhe pse është e banuar, për shkak se janë gjetur një sërë parregullsish në ndërtimin e tij.  Përveçse ka probleme me lejen e ndërtimit, stuktura e këtij pallati rrezikon të shembet për shkak të kushteve teknike, duke u bërë kështu kërcënim serioz për banorët.

Ndërtuesi i këtij pallati 28 katësh është bzinesmeni Enver Shala, i cili ka në zotërim edhe disa pallate të tjera që kanë patur probleme me lejet e ndërtimit. Sipas burimeve të Shqiptarja.com mësohet se Enver Shala nuk ka bërë kanosje ndaj inxhinerëve dhe drejtuesit, Agron Hysenlliu, që kanë formuar relacionin, por vetëm një debat në telefon. Debat ky i lindur pas relacionit të inxhinierëve nga Instituti i Ndërtimeve për prishjen e kësaj ndërtese 28 katëshe.

Pallati në fjalë dy vite më parë pati probleme me strukturën metalike, çka bëri që  katet e fundit shtesë të shembeshin. Kjo rrezikoi jetën e punëtorëve, por edhe banorëve që jetojnë në këtë pallat.  Në atë kohë biznesmeni Enver Shala u hetua në gjendje të lirë.

Gjithashtu shtetasit në fjalë në vitin 2013 i është prishur një tjetër ndërtesë, kompleksi "Kamelia" i ndërtuar po në qytetin e Durrësit.

TAG:
• Durres
• prishet pallati
• Instituti i Ndërtimit