Ministria e Jashme bën të ditur se, “vendi ynë ka ndërmarrë konsultime të shumta me Bashkimin Evropian dhe aktorë të tjerë rajonalë, me synim kryesor krijimin e një sinergjie midis programit të presidencës së NAJ-it dhe Strategjisë së Bashkimit Evropian për Rajonin Adriatiko-Jonian, EUSAIR”.
“Në këtë mënyrë, Shqipëria arriti të sigurojë mbështetjen e plotë nga Komisioni Evropian për organizimin e Takimit të Këshillit të Ministrave të Punëve të Jashtme të Adriatikut e Jonit (AIC) njëkohësisht me Konferencën për Strategjinë e Bashkimit Evropian, në datat 6-7 shkurt 2014 në Athinë. Kjo konferencë është një ndër aktivitetet më të mëdha që Komisioni Evropian organizon në semestrin e parë të vitit 2014”, bëri të ditur gjatë ditës së sotme, Ministria e Jashme.
Takimi i Ministrave të Punëve të Jashtme të NAJ-it është vlerësuar gjerësisht si aktiviteti më i rëndësishëm i Nismës Adriatiko-Joniane që nga themelimi i nismës në vitin 2000. Kontributi kryesor i këtij takimi ishte sigurimi i një mbështetjeje të fortë politike nga të gjitha vendet anëtare për Strategjinë e BE-së për Rajonin e Adriatikut e Jonit (EUSAIR), mbështetje e cila ishte në përputhje me kërkesat e Bashkimit Evropian. Në këtë aktivitet ishin të pranishëm Komisionerja për Çështjet Detare dhe Peshkimin, Maria Damanaki, si dhe Komisioneri për Politikat Rajonale, Johannes Hahn.
Shqipëria drejtoi në mënyrë të suksesshme këtë aktivitet shumëpalësh rajonal duke i dhënë vizibilitet të lartë Ministerialit gjatë dy ditëve të zhvillimit të Konferencës së Strategjisë së BE-së për Rajonin e Adriatikut dhe Jonit (EUSAIR).
Redaksia online
(ac/shqiptarja.com)
