Greqi, votëbesohet
qeveria e Papademos

Qeveria e re greke e udhëhequr nga kryeministri Lucas Papademos fitoi votëbesimin në parlament. Votuan pro qeverisë së re 255 deputetë, ndërsa 33 të tjerë votuan kundër. Në votim morën pjesë 293 deputetë.

Ata që votuan kundër ishin deputetët e Partisë Komuniste, SYRIZA, dy deputetë të PASOK dhe një i Demokracisë së re. Një nga deputetët e PASOK deklaroi si arsye për votën kundër, faktin që në qeveri marrin pjesë ekstremistët e LAOS, ndërkohë që kritka të ashpra erdhën edhe nga kreu i partisë komuniste dhe i SZRIZA.

Para votëbesimit Papademos thas se "Greqia duhet të mbetet në eurozonë". “Zgjidhje magjike nuk ka. Puna që na pret është jashtëzakonisht e madhe në raport me kohën që kemi në dispozicion, ndaj nuk duhet të krijohen iluizione për atë që do të bëjë kjo qeveri”. "Ne mund të dëshmojmë se jemi në gjendje ta ndryshojmë vendin. Kjo është e rëndësishme për një të ardhme pozitive, edhe për të ardhmen e rinisë. Është në dorën tonë. Ne e kemi forcën për ta bërë këtë," tha Papademos.

Qeveria e re duhet të zbatojë reformat strikte të kërkuara nga ndërkombëtarët në këmbim të fondit që Greqisë i duhet për të shpëtuar nga falimentimi.

Qeveria e re përbëhet nga anëtarë të Partisë Socialiste, Partisë Konservative dhe asaj të Djathtë. Kabineti i ri do të ketë për detyrë të shtyjë përpara rritjen e taksave dhe shkurtimin e shpenzimeve.

Kryeministri i ri grek Lucas Papademos është shprehur optimist se me ndihmën partnerëve të saj Athina do të dalë nga kriza.