Grupi i PD: Vendimet e Kushtetueses
 kusht për reformën në drejtësi

Partia Demokratike do të kushtëzojë angazhimin e saj për reformën në drejtësi, me kërkesat për zbatimin e vendimeve të Gjykatës Kushtetuese. Pas seancës së Kuvendit, grupi i PD u mblodh nën drejtimin e Lulzim Bashës, pas kthimit nga SHBA, për të vendosur marrëdhëniet e mëtejshme me Kuvendin.
 
Burime pranë PD thanë për Shqiptarja.com se demokratët do të kushtëzojnë reformën në drejtësi me zbatimin e kërkesave për dërgimin e mandateve të deputetëve në Gjykatën Kushtetuese.
 
"Dialog me kusht për Reformën nëse zbatohen vendimet e Gjykatës Kushtetueses. Konsensus politik do të bazohet mbi zbatimin e vendimeve Kushtetueses për mandatet e deputetëve. Është paradoks të diskutosh ndryshimet Kushtetuese kur nuk zbaton vendimet e saj", thanë burimet.
 
Propozimet e tyre, demokratët ranë dakord në mbledhjen e grupit t'ia paraqesin Komisionit ad hoc, i planifikuar për tu mbledhur në orën 18:00, por në momentin e fundit vendimi i tyre ishte që të mos merrnin pjesë. Kjo bëri që komisioni të shtynte mbledhjen për të tretën herë radhazi brenda ditës. 

Partia Demokratike kërkon dërgimin në Gjykatën Kushtetuese të mandateve të deputetëve Rakip Suli e Valentina Leskaj, si të dyshuar për përfitimin e fondeve publike gjatë ushtrimit të funksionit të deputetit. 
 
Gjatë kësaj mbledhje të grupit parlamentar, kryetari demokrat, Lulzim Basha ka informuar deputetët edhe mbi vizitën e tij në Shtetet e Bashkuara të Amerikës. 

Redaksia Online
Shqiptarja.com