Deklarata e komisionerit Hahn u bë gjatë përurimit të zyrave të reja të Pallatit të Drejtësisë në Prishtinë, ku shoqërohej nga Presidentja e Kosovës Atifete Jahjaga si dhe Kryeministri, Isa Mustafa.
"Një bllok i ndërtesave të rëndësishme është edhe ky Pallat i Drejtësisë, në të cilin do të mbështetet zhvillimi dhe fuqizimi i mëtejshëm i "ndërtimit të sundimit të ligjit" në Kosovë. Ne do të vazhdojmë të mbështesim Kosovën në këtë përpjekje. Duhet të vazhdojmë të punojmë së bashku në këtë drejtim, jo vetëm me politikanë dhe vendimmarrës të tjerë, por edhe me praktikues të drejtësisë, do të thotë me gjykatës, prokurorë dhe me stafin e tyre", theksoi Hahn. Ai theksoi se sundimi i ligjit është themeli mbi të cilin është ndërtuar BE-ja.
"Ata që aspirojnë t'i bashkohen Bashkimit Evropian duhet të promovojnë funksionimin e duhur të institucioneve themelore që sigurojnë sundimin e ligjit. Sundimi i ligjit është vlerë qenësore demokratike por njësoj e rëndësishme për një mjedis afarist të qëndrueshëm, duke ofruar siguri ligjore për operatorët ekonomikë, duke mbështetur konsumatorët dhe duke stimuluar investimet, krijimin e vendeve të punës dhe zhvillimin. Një gjyqësor funksional, i paanshëm dhe i pavarur është një pasuri pa të cilën nuk mund të funksionojë një vend i qëndrueshëm dhe i suksesshëm", theksoi Hahn.
Kryeministri Mustafa tha se, është evidente se Bashkimi Evropian ka kontribuar shumë në krijimin dhe forcimin e sistemit të drejtësisë, ka kontribuar në forma të ndryshme, përmes asistencës në ngritjen e kapaciteteve, përmes Misionit të EULEX-it, përmes projekteve IPA-s dhe formave tjera.
"Ne po bëjmë hapa të domosdoshëm për pavarësinë e sistemit të drejtësisë dhe për forcimin e sistemit të drejtësisë. Ky pallat i ndërtuar me standarde evropiane, ofron një hapësirë të madhe për ushtrimin e funksionit të Gjykatave dhe Prokurorive dhe ju mundëson qytetarëve qasje më të lehtë në institucionet e drejtësisë", tha kryeministri kosovar./ATSH/
