Hakerët zbulojnë të dhënat sekrete të Rusisë, rreth 400 mijë të vrarë në Ukrainë! Kushner: Për paqen duhet dialog mes Moskës dhe-Europës

Dronët ukrainas goditën të hënën rafinerinë KINEF, në rajonin rus të Leningradit, duke shkaktuar zjarre të mëdha dhe dëmtuar tri njësi të rëndësishme të përpunimit të naftës.

Guvernatori i rajonit të Leningradit, Alexander Drozdenko, deklaroi se sistemet ruse të mbrojtjes ajrore kishin rrëzuar 113 dronë që synonin këtë rajon. Megjithatë, mbetjet e njërit prej tyre goditën çatinë e një ndërtese shumëkatëshe në qytetin Vsevolozhsk, duke shkaktuar vdekjen e një banori.

Sipas raportimeve, janë dëmtuar tri njësi kryesore të përpunimit në kompleksin Kirishinefteorgsintez (KINEF).

KINEF është rafineria më e madhe në veriperëndim të Rusisë dhe e dyta më e madhe në të gjithë vendin, pas asaj të Omskut. Ajo është në pronësi të grupit Surgutneftegaz dhe përpunon rreth 18 milionë tonë naftë bruto në vit, ose afërsisht 7 për qind të kapacitetit të përgjithshëm të rafinimit të Rusisë.

Rafineria prodhon benzinë, naftë diesel, vajguri për aviacionin, mazut, bitum dhe produkte petrokimike. Ajo furnizon gjithashtu me karburant aviacioni aeroportin Pulkovo të Shën Petersburgut.

Kapaciteti i saj projektues arrin në 20–21 milionë tonë naftë në vit.

Kjo nuk është hera e parë që rafineria vihet në shënjestër të forcave ukrainase që prej nisjes së pushtimit rus në shkurt të vitit 2022. Grupi Surgutneftegaz është përfshirë në listat e sanksioneve të Bashkimit Evropian, Shteteve të Bashkuara dhe Mbretërisë së Bashkuar në vitin 2025.

Ndërkohë, Ministria ruse e Mbrojtjes njoftoi se forcat e saj kishin rrëzuar 430 dronë ukrainas gjatë natës, në 14 rajone të Rusisë dhe në Krimenë e pushtuar. Këto pretendime nuk janë verifikuar në mënyrë të pavarur nga Euronews.

Rosneft kufizon shitjen e karburantit në gjashtë rajone

Në një zhvillim tjetër, kompania shtetërore ruse Rosneft njoftoi të hënën vendosjen e kufizimeve për shitjen e benzinës dhe naftës diesel në pikat e saj të karburantit.

Masat kanë hyrë në fuqi në Kareli, Buriati, krahinën e Zabaikalskit, si dhe në rajonet Novosibirsk, Arkhangelsk dhe Penza, sipas mediave ruse.

Në qytete, drejtuesit e automjeteve mund të blejnë deri në 30 litra karburant për çdo transaksion, ndërsa në autostrada kufiri është 50 litra.

Në krahinën e Krasnojarskut zbatohen kufizime të veçanta: deri në 30 litra benzinë AI-95, 50 litra AI-92 dhe 100 litra naftë diesel për çdo klient.

Edhe autoritetet e rajonit të Leningradit u kanë rekomanduar pikave të karburantit të kufizojnë shitjen në 30 litra benzinë dhe 50 litra naftë diesel për çdo transaksion.

Sulmet ruse ndaj Ukrainës vijojnë

Ndërkohë, sulmet ruse ndaj territorit ukrainas kanë vijuar edhe gjatë orëve të fundit.

Sipas Forcave Ajrore të Ukrainës, ushtria ruse ka lëshuar 317 dronë të tipit Shahed që prej mbrëmjes së së hënës. Mes tyre kishte 105 variante me motor reaktiv, si dhe dronë të modeleve Banderol/Dan-T, Gerbera dhe mjete të përdorura si karrem për të çorientuar mbrojtjen ajrore.

Nga këta, 276 dronë u rrëzuan. Megjithatë, goditje u regjistruan në 31 zona, ndërsa mbetje dronësh ranë në nëntë vendndodhje të tjera.

Një sulm me dron ndaj një magazine ushqimore në Odesa, të hënën në mëngjes, shkaktoi vdekjen e tre personave dhe plagosjen e një tjetri, i cili ndodhet në gjendje të rëndë.

Në rajonin e Dnipropetrovskut, dy persona humbën jetën dhe shtatë të tjerë u plagosën nga sulmet ruse.

Nëntë persona, mes tyre edhe fëmijë, u plagosën gjatë sulmeve të kryera gjatë natës së së hënës në rajonin e Harkivit.

Gjashtë persona, përfshirë një fëmijë, mbetën të plagosur nga sulmet në Zaporizhia dhe zonat përreth.

Në qytetin Kremenchuk, në rajonin e Poltavës, një sulm me dron plagosi shtatë persona, mes tyre edhe një 16-vjeçar. Nga goditja u shkatërrua gjithashtu një qendër rehabilitimi për fëmijët me aftësi të kufizuara.

Në Sumy, tre punonjës të sektorit energjetik u plagosën të hënën në mëngjes, pasi një sulm rus goditi automjetin me të cilin po udhëtonin.

Ndërkohë, forcat ruse kanë goditur tri herë me dronë ekipet e shpëtimit në Kamyshivakha, teksa këto të fundit po pastronin rrënojat e një sulmi ajror rus të 2 nëntorit, ku humbën jetën 55 persona.

Sipas autoriteteve, deri në 19 persona mund të jenë ende të bllokuar nën rrënoja. Deri më tani, policia ka bërë të mundur identifikimin e 30 viktimave.

Presidenti i Shteteve të Bashkuara të Amerikës, Donald Trump, la të kuptohet se territori i Ukrainës mund të pësojë ndryshime në kuadër të një marrëveshjeje të ardhshme me Rusinë, vetëm pak ditë përpara zhvillimit të bisedimeve të ndërmjetësuara nga SHBA-ja mes Kievit dhe Moskës në Abu Dhabi.

“Besoj se do ta arrijmë marrëveshjen dhe se kjo do të ndodhë. Në fund, Ukraina do të ketë një formë paksa të ndryshme”, deklaroi Trump në një intervistë për emisionin “60 Minutes” të televizionit CBS, të publikuar të hënën.

Deklaratat e tij vijnë në prag të negociatave trepalëshe mes Ukrainës, Rusisë dhe Shteteve të Bashkuara, të planifikuara për datat 10–11 nëntor në Abu Dhabi, në Emiratet e Bashkuara Arabe.

Trump u shpreh optimist për arritjen e një marrëveshjeje, megjithëse Kievi dhe Moska vijojnë të kenë qëndrime thellësisht të kundërta lidhur me çështjen e territoreve dhe garancitë e sigurisë që do të shoqëronin një armëpushim.

“Po zhvillohet një takim shumë i rëndësishëm”, tha Trump. “Besoj se kjo luftë do të përfundojë dhe se do të përfundojë së shpejti. Dhe e vetmja arsye që do të përfundojë është unë”.

Presidenti amerikan nuk dha hollësi të mëtejshme se çfarë nënkuptonte me ndryshimin e kufijve të Ukrainës dhe as nuk specifikoi se cilat ndryshime territoriale mund të përfshihen në një marrëveshje të mundshme.

Kancelari gjerman Friedrich Merz ka paralajmëruar se do të bllokojë marrëveshjen për buxhetin e Bashkimit Europian për periudhën 2028-2034, nëse të gjitha vendet anëtare nuk angazhohen të financojnë Ukrainën gjatë vitit 2027 dhe në vitet pasuese.

Sipas Financial Times, në një letër drejtuar presidentit të Këshillit Europian, Antonio Costa, Merz kërkon që të gjitha shtetet të kontribuojnë në mënyrë të barabartë për mbulimin e nevojave financiare të Kievit, i cili përballet me një mungesë prej 70 miliardë eurosh për vitin e ardhshëm.

BE-ja është zotuar të mbulojë rreth 45 miliardë euro, por Hungaria, Sllovakia, Bullgaria dhe Republika Çeke kanë sinjalizuar se nuk do të japin ndihma të tjera financiare. Ultimatumi vjen përpara takimit të liderëve europianë në Dublin, të enjten dhe të premten, ku Merz kërkon të diskutohet financimi i Ukrainës.