Hamad: Hamasi nuk është i interesuar për një luftë të re me Izraelin

Hamasi nuk është i interesuar për një tjetër lufte me Izraelin, u shpreh sot një zyrtar i lartë i lëvizjes islamike që kontrollon Rripin e Gazës.
"Ne kemi interes në ruajtjen e qetësisë në Rripin e Gazës. Ne nuk duam një luftë tjetër", tha zëvendësministri i Jashtëm "de facto" Gazi Hamad, në prag të përvjetorit të parë të konfliktit 50-ditor mes Izraelit dhe Gazës.
Hamad i bëri komentet në një intervistë të rrallë në Radion e Izraelit në të cilën ai foli në hebraisht.
Hamasi dhe Izraeli nuk kanë kontakte të drejtpërdrejta duke qënë se lëvizja radikale palestineze refuzon të njohë të drejtën e Izraelit për të ekzistuar.
Megjithatë, Hamad shihet si një nga anëtarët më të moderuar të Hamasit.
Hamasi dhe grupet e tjera palestineze aktive në Gaza kanë lëshuar më shumë se 4 000 raketa në Izrael gjatë konfliktit të vitit të kaluar.
Kushtet për 1,8 milionë palestinezë që jetojnë në enklavë vazhdojnë të jenë të vështira.
Shkollat, spitalet dhe shtëpitë janë të gjitha në kushte të tmerrshme, ndërsa papunësia dhe varfëria mbetet ende në shifra të larta.
"Unë mund të them se situata në Gaza është e keqe, shumë e keqe", tha ai pasi i bëri thirrje komunitetit ndërkombëtar për t'i bërë presion Izraelit që t'i japë fund "pushtimit" të tij në Rripin e Gazës dhe Bregun Perëndimor.
Izraeli thotë se tashmë nuk e zotëron më Rripin e Gazës që pas tërheqjes së njëanshme të ushtrisë dhe çrrënjosjes së vendbanimeve të saj në vitin 2005.
Megjithëse ai vazhdon të kontrollojë kufijtë dhe ujërat në brigjet e Gazës.

/Shqiptarja.com