HEC-et Bistrica 1 e Bistrica 2
dalin në shitje, sot hapet tenderi

TIRANE-Nis sot seanca publike e hapjes së ofertave për shitjen e aksioneve të shoqërisë “HEC Bistrica 1 dhe Bistrica 2” sh.a. Vendimi për nxjerrjen në shitje të këtyre dy HEC-ve u mor nga qevera pas tenderit për privatizimin e kompanisës së naftës “Albpetrol”. Qeveria nxorri në shitje dhe Hidrocentralin e Ulëzës e Shkopetit, por për këta dy të fundit seanca publike e hapjes së ofertave do të zhvillohet nga mesi i javës.

Zhvillimi i tenderit vjen pas dështimit të këtij procesi 3 muaj më parë, pasi nuk pati oferta që mund të cilësoheshin të leverdishme për blerjen e 4 HEC-eve. Mësohet se interes për blerjen e 4 HEC-eve kanë shprehur 8 kompani, mes të cilëve 7 të huaja dhe një konsorcium shqiptar.

Kompanitë e interesuara për privatizimin e 4 HEC-eve
1. Verbund AG – Austri
2. EVN - Austri
3. CNR - Francë
4. Limak Energy - Turqi
5. Kurum Group - Turqi
6. Andritz Hydro - Austri
7. Tozzi Sud Spa - Itali
8. Agna Group, Gener-2, Cara-El, Erioni shpk - Shqipëri

Përmes procesit të shitjes së 4 HEC-eve, qeveria shqiptare synon të përfitojë një shumë prej 100 milionë eurosh. Por nga ana tjetër ekspertët deklarojnë se vlera reale e 4 HEC-eve është rreth 300 milionë euro. Kjo për faktin se këto hidrocentrale i janë nënshtruar kohët e fundit një procesi rikonstruksioni.

Privatizimi i HECE-eve do të jetë i plotë dhe kompanitë që do të shpallen fituese do të zotërojnë të gjitha të drejtat e shfrytëzimit. Pas dorëzimit të ofertave, komisioni i ngritur nga Ministria e Ekonomisë do të vlerësojë ofertuesin më të mirë për shitjen e veprave. Nëse do të llogaritej vlera e hec-eve, duke marrë parasysh jetëgjatësinë e tyre prej 250 deri në 300 vjet, prodhimin mesatar vjetor të energjisë prej 550 mijë MË/h dhe çmimin mesatar prej 65 euro për MW, në treg do të kushtonin në total rreth 300 milionë euro.

Këto vepra janë ndërtuar nga mesi i viteve 60-të dhe aktualisht janë në gjendje të mirë teknike.

Duket se vendimi i qeverisë për privatizimin e veprave vjen si pasojë e mungesës së të ardhurave në buxhetin e shtetit. Të katër hidrocentralet prodhojnë 6% të energjisë në vend me një fuqi totale të instaluar prej 80 MË, duke rezultuar fitimprurëse për Korporatën Energjetike Shqiptare (KESH).
(sg/jd/shqiptarja.com)

/Shqiptarja.com