Autoriteti Kombëtar i Ushqimit ka zhbllokuar aktivitetin e kompanisë së kateringut 'SORI-AL', e cila merrej me përgatitjen e ushqimit për Akademinë e Sigurisë, por edhe për institucione të tjera ku operonte.

Aktiviteti i kompanisë 'SORI-AL' ishte bllokuar pas helmimit të 52 studentëve te Akademia e Sigurisë në Sauk. Po ashtu kjo kompani ishte gjobitur me 1.5 milionë lekë për ushqim të pasigurt dhe kushte të papërshtatshme higjeno-sanitare.

Vendimi për zhbllokimin e aktivitetit të kompanisë erdhi pasi analizat e mostrave për higjenën ambientale dhe të pajisjeve të punës brenda ambienteve të kuzhinës së Akademisë së Sigurisë, kanë rezultuar brenda normave të lejuara për treguesit e higjenës.

Kujtojmë se 52 studentët e Akademisë së Sigurisë dyshohet se më 6 maj u helmuan nga makaronat e kontaminuara me bakteret Escherichia coli dhe stafilokok.

Të paktën ky ishte rezultati i analizave të Autoritetit Kombëtar të Ushqimit, në bazë të të cilave u bllokua aktiviteti i kompanisë së kateringut “SORI-Al”.

Sipas AKU-së, nga nëntë mostra të marra për analiza, tetë rezultuan brenda normave, ndërsa një kampion makarona të gatshme, i marrë në kuzhinën e Akademisë së Sigurisë në Sauk, rezultoi pozitive me dy bakteret.

Akademia u siguronte studentëve, të treja vaktet, me katering, nga kompania SORI-Al, administratorja e së cilës po hetohet në gjendje të lirë.

Njoftimi i AKU:

Në vijim të njoftimeve të kryera nga Autoriteti Kombëtar i Ushqimit, në lidhje me ndjekjen e rastit të helmimit të kursantëve në Akademinë e Sigurisë në Sauk, bëjnë  me dije se, AKU kreu procedurën e marrjes së mostrave  për higjienën ambientale dhe të pajisjeve të punës brenda ambienteve të kuzhinës së Akademisë së Sigurisë, Sauk dhe brenda ambienteve të kuzhinës së  Garnizonit, të Forcave te Armatosura.

Pas analizimit të tyre pranë laboratorit të Referencës ISUV , informojmë që kanë rezultuar brenda normave të lejuara për treguesit e higjienës.

Referuar këtyre raport- provave është kryer procedura e inspektimit në adresat brenda ambienteve të Akademisë së Sigurisë, Sauk, Tiranë dhe brenda ambienteve te Garnizonit, te Forcave te Armatosura, Tiranë.

Në përfundim të procedurës AKU kreu zhbllokimin e  aktivitetit të subjektit SORI-AL, si dhe i la detyrë të kryejë analiza autokontrolli për produktin e gatshëm brenda ambienteve të Garnizonit të Forcave të Armatosura, në zbatim të kërkesave të legjislacionit në fuqi.

Lajm në përditësim...