Hetimi i CEZ/Miratohet kërkesa
 e PD, PS me komision paralel

Parlamenti ka votuar dje ngritjen e dy komisioneve hetimore për hetimin e skandalit të pretenduar në CEZ.

Një komision do të drejtohet nga opozita dhe do të hetojë veprimtarinë e këtij institucioni pas  shtatorit të vitit 2013 kur mori pushtetin e majta, dhe komisioni i dytë do të drejtohet nga mazhoranca dhe do të hetojë veprimtarinë e CEZ në qeverisjen Berisha, përfshi edhe privatizimin e tij.

Por Ermonela Felaj, ministrja për Marrëdhëniet me Parlamentin tha dje se ngritja e komisionit hetimor lidhur me marrëveshjen mes Qeverisë shqiptare dhe CEZ-it pengon hetimet e prokurorisë.

Nga foltorja e parlamentit, Felaj u shpreh se ngritja e komisionit, që është kërkesë e Partisë Demokratike, ushtron presion mbi prokurorinë që aktualisht po heton për këtë çështje, cënon provat si dhe është një mënyrë "për të shmangur fajtorët e vërtetë".

Felaj u ndal edhe në dy komisionet hetimore që aktualisht kryejnë funksionin e tyre, atë për serverin e tatimeve dhe për emërimet në administratë:

“Më shumë se 2 vjet kemi 2 komisione dhe puna është e pa përfunduar, ju asgjë nuk do përfundoni”, ndërsa shtoi se kur PS ishte në opozitë kërkesat e saj për ngritjen e komisioneve hetimore nuk janë pranuar. “Përfundimisht për ju vlen qartë shprehja. Ngritja e komisioneve hetimore mjeti më i mirë për të kaluar kohë”, e mbylli fjalën e saj Felaj. 

Redaksia online
(u.s/shqiptarja.com)