Hoxhaj: Javën e ardhshme priten
njohje të reja për kosovën

PRISHTINE- Ministri i Punëve të Jashtme të Kosovës, Enver Hoxhaj, ka paralajmëruar se gjatë javës së ardhshme pritet të ketë njohje të reja për Kosovën.

Pas pjesëmarrjes në Samitin vjetor Franko-Afrikan që u mbajt në Paris dhe pjesëmarrjes në Samitin e 40 të Këshillit të Ministrave të Jashtëm të Organizatës për Bashkëpunim Islamik (OBI), që u mbajt në shtetin Guinea Conakry të Afrikës, ministri i Punëve të Jashtme, Enver Hoxhaj, thotë se disa vende anëtare të OBI-t do të marrin vendim për njohje të Republikës së Kosovës.

“Gjatë këtyre ditëve kam marr pjesë në dy takime të mëdha multilaterale, së pari kam marr pjesë në takimin në Francë dhe pastaj në Afrikë. Në Samitin vjetor Franko-Afrikan pata mundësinë të takohem me tetë ministra të vendeve, të cilat nuk e kanë njohur Kosovën, përderisa në takimin e Organizatës për Bashkëpunim Islamik në Guinea Conakry kam takuar 28 ministra të cilët kanë qenë të pranishëm në këtë konferencë. Organizata për Bashkëpunim Islamik i ka 57 vende, nga to janë edhe më tej 22 vende që nuk e kanë njohur Kosovën. Mund të them se kam pasur mundësinë t’i takojë përfaqësuesit e 20 vende mosnjohëse. Jam shumë i sigurt se gjatë javëve të ardhshme, muajve të ardhshëm, këto vende të cilat i kam takuar, nga të cilat kam kërkuar ta njohin Republikën e Kosovës si shtet sovran dhe i pavarur, të cilave ua kam dorëzuar zyrtarisht kërkesat për njohje, se pse një vend duhet ta njohë pavarësinë e Kosovës dhe të marrin vendim për njohjen e Kosovës. Besoj se gjatë javës mund të kemi lajme pozitive nga këto vende të cilat do ta bëjnë publik vendimin e tyre për njohje të Kosovës”, ka thënë Hoxhaj.

Ai ka bërë me dije se takimet që ka pasur me shumë personalitete të larta të këtyre shteteve ishin shumë cilësore. “Shumica e ministrave të këtyre shteteve, që i kam takuar, e kuptojnë të drejtën e popullit të Kosovës për pavarësi. E kuptojnë se procesi i njohjes është i pandalshëm dhe kam marr premtime konkrete që disa nga këto vende do ta njohin vendin tonë”, ka thënë Hoxhaj.

Marrë nga "RTK"

Redaksia Online
(e.s/shqiptarja.com)