Futbolli shqiptar dhe qyteti i Librazhdit kanë humbur një nga figurat e tyre më të respektuara. Besnik Çota, ish-kapiteni dhe ish-trajneri i KF Sopotit, u nda nga jeta mbrëmjen e së mërkurës në moshën 56-vjeçare, pas një beteje të gjatë me një sëmundje të rëndë.

Çota ndërroi jetë në një spital në Tiranë, ku po merrte trajtim mjekësor. Prej vitesh ai vuante nga një sëmundje e rëndë dhe i ishte nënshtruar trajtimit me dializë.

Lajmi i hidhur ka tronditur familjarët, miqtë, ish-bashkëlojtarët, tifozët dhe gjithë komunitetin sportiv të Librazhdit. Përtej kontributit të tij në futboll, Besnik Çota do të kujtohet si një njeri me integritet, i respektuar dhe i vlerësuar nga të gjithë ata që e njohën.

I konsideruar si një nga futbollistët më të mirë në historinë e KF Sopotit, Çota spikati në vitet '90 si mesfushor organizator, duke u dalluar për teknikën, vizionin e lojës dhe aftësinë për të udhëhequr skuadrën në momentet më të rëndësishme. Me shiritin e kapitenit në krah, ai u bë një prej simboleve të klubit dhe la gjurmë të pashlyeshme në futbollin librazhdas kur ky ekip militoi edhe në elitën e vendit.

Edhe pas mbylljes së karrierës si futbollist, ai nuk u shkëput nga sporti. Si trajner, iu përkushtua zhvillimit të brezave të rinj, duke drejtuar ekipet zinxhir të Sopotit dhe më pas edhe skuadrën e parë, ku vazhdoi të japë kontribut të çmuar për klubin dhe futbollin e qytetit.

Klubi buzë lumit Shkumbin ka bërë një reagim të ndjerë duke i dhënë lamtumirën ish-trajnerit dhe ish-futbollistit që për 12 vite mbajti në krah shiritin e kapitenit të ekipit. "Sopoti dhe qyteti i Librazhdit do të jenë borxhli gjithmonë për atë që i dhe futbollit", shkruan mes të tjerash klubi.

Mesazhi i KF Sopotit:

Lamtumirë Bes Çota!

Një nga lojtarët më të mirë të të gjitha kohërave për Sopotin, trajner i shumë brezave që u rrritën me atë fanellë, njeriu që i dha aq shumë Klubit të Futbollit Sopoti u shua sot pas një beteje të gjatë shëndetësore.

Për Besën Sopoti ishte familja e tij.

Sopoti dhe qyteti i Librazhdit do të jenë borxhli gjithmonë për atë që i dhe futbollit.

Ngushëllime djemve të tij Noelit, Leos dhe gjithë familjarve!

“Come te, nessuno mai”

Askush nuk do të jetë si ti, kurrë!

Do të mbetesh përgjithmonë në zemrat tona.