Sali Berisha foli për herë të parë për humbjen shumë thellë të Bashkisë së Kukësit, gati 1 javë pas daljes së rezultatit, ku kandidati i tij u mund me mbi 5500 vota diferencë nga Albert Halilaj.  Përgjegjësinë Berisha nuk ia vë vetes, por thotë se qytetarët u blenë.

 “Në Kukës, zgjedhjet u blenë në mënyrën më të pamëshirshme. Belinda Balluku, Taulant Balla, janë marrë me shpërndarje parash 1 javë rresht me thasë në qarkun e Kukësit.  Që në muajin prill, në një lokal në Kukës, janë ulur fatkeqësisht një zyrtar shumë i lartë i PS me drejtorin e OSHEE të qarkut. Tavolina ka pasur përgjues dhe në këtë përgjim është e regjistruar se është bërë pazari që drejtori i OSHEE do të bëjë një tender me kaq miliona lekë. Shërbimi informativ, që ka qenë institucioni që ka vendosur përgjuesin, përgjimin ia ka sjellë Edi Ramës.”

E vetmja përgjegjësi e tij, thotë Berisha, është të thërrasë protesta dhe se vetëm në këtë mënyrë do ta rrëzojë Qeverinë.

11 Përjashtimet e bëra të deputetëve të tij nga grupi parlamentar i PD me firmë të Lulzim Bashës, për ish kryeministrin janë një tjetër pro vë se kreu i PD është peng.

"Veprimet e peng-Bashës janë akte vetëposhtërimi që i imponohen atij dhe dëshmojnë se është një peng i pashpresë. Në historinë politike të Shqipërisë, askush nuk ka shkelmuar mbi dinjitetin e vet siç ka shkelmuar ky njeri. Por është zgjedhja e tij. Fajin e ka vetë!"- tha Berisha

Refuzon të thotë nëse pas këtij hapi të Bashës, me të gjithë të përjashtuarit, që në total arrijnë në rreth 20, bashkë me Berishën, do të krijojë grupin e vet parlamentar.

" Grupi parlamentar i PD po afrohet dhe po shkon drejt zgjidhjes së problemeve."- vijoi ai. 

Gjatë, u ndal edhe në çështjen e veriut, duke kritikuar qëndrimet e kryeministrit Rama, që sipas tij, i shërbejnë Vuçiç e Serbisë dhe jo Kosovës.

Lulzim Basha largoi nga grupi parlamentar i PD 11 deputetë të rreshtuar në krah të Rithemelimit të Sali Berishës. Vendimi lë jashtë grupit parlamentar të gjithë deputetët e Rithemelimit, ndërsa pjesë e tij zyrtarisht do të jenë deputetët mbështetës të Bashës dhe Gazment Bardhit.