Donald Trump po zbaton një tarifë të re doganore globale prej 10% në vend të 15% të shpallur gjatë fundjavës pas humbjes së tij në Gjykatën e Lartë, sipas një njoftimi nga Agjencia Amerikane e Doganave.

Veprimi i Trump për taksën doganore 10% erdhi pas një reagimi negativ nga disa partnerë tregtarë të SHBA-së, përfshirë BE-në dhe Mbretërinë e Bashkuar.

Shtëpia e Bardhë sinjalizoi se Trump është ende i gatshëm të vendosë një tarifë doganore globale prej 15%. “Po punohet dhe do të vijë më vonë,” tha një zyrtar, pa specifikuar një afat kohor.

Pas vendimit të Gjykatës së Lartë të premten, që vendosi se tarifat doganore që Trump kishte vendosur mbi partnerët tregtarë të SHBA-ve bazuar në fuqitë emergjente ishin të paligjshme, presidenti veproi shpejt për t’i zëvendësuar ato nën një statut tjetër me një taksë doganore globale të përkohshme prej 10% për 150 ditë duke filluar të martën.

Zbatimi i vonuar i tarifës doganore prej 15% mund të ofrojë një mundësi për qeveritë dhe bizneset që të kërkojnë përjashtime dhe të sigurojnë trajtim preferencial nga Trump.

Administrata Trump ofroi përjashtime për një gamë të gjerë produktesh nga tarifa doganore prej 10% kur u shpall të premten, si dhe për shumë produkte importi nga Kanadaja dhe Meksika.

Taksa e re doganore globale ka shkaktuar reagim negativ midis aleatëve europianë të SHBA-ve, të cilët vitin e kaluar kishin arritur marrëveshje tregtare preferenciale në këmbim të tarifave doganore më të ulëta me Trump dhe tani po përjetojnë tkurrje të përfitimeve.

Të hënën, pas bisedimeve gjatë fundjavës midis zyrtarëve të lartë amerikanë dhe britanikë, Doëning Street tha se mund të hakmerret duke paralajmëruar se “asgjë nuk përjashtohet” nëse SHBA zbaton tarifën doganore prej 15%.

Ndërkohë, BE-ja po shtyn ratifikimin e marrëveshjes së saj të tregtisë me SHBA-të si reagim ndaj planit për tarifën 15%.

Në një bisedë telefonike të hënën në mbrëmje me Hoëard Lutnick, ministri japonez i Tregtisë, Ryosei Akazaëa, u bëri thirrje SHBA-ve të sigurohen që çdo ndryshim në regjimin e tarifave të mos krijojë një barrë më të madhe për eksportet japoneze.

Pas muajsh negociatash, dy vendet arritën një marrëveshje në korrik, sipas së cilës tarifat mbi eksportet automobilistike japoneze drejt SHBA-ve u ulën nga 27.5% në 15%, në këmbim të 550 miliardë dollarëve financim dhe investime japoneze në infrastrukturën dhe industrinë amerikane.

Tre projekte, që përfaqësojnë nevoja financimi prej 36 miliardë dollarësh, u shpallën javën e kaluar, dhe pritet të ketë më shumë gjatë vizitës së planifikuar në Uashington nga kryeministrja Sanae Takaichi në mars.

Tajvani, partneri i katërt më i madh tregtar i SHBA-ve, tha të martën se po kërkon bisedime të reja me Uashingtonin për të parandaluar që marrëveshja dypalëshe e nënshkruar më pak se dy javë më parë të dëmtohet nga tarifat e fundit dhe çdo taksë tjetër që administrata Trump mund të vendosë në të ardhmen.